Rusiya Prezidenti Vladimir Putin və Ukrayna Prezidenti Vladimir Zelenski arasında şəxsi görüş üçün hazırda konkret əsas yoxdur.
NOCOMMENT.az xəbər verir ki, bu barədə Federasiya Şurasının sədri Valentina Matviyenko mətbuat konfransında bildirib.
“Ümumiyyətlə, (Putin və Zelenski arasında) görüş üçün mövzu yoxdur. Belə bir əsas bu gün mövcud deyil,” – deyə senator vurğulayıb.
Onun sözlərinə görə, dövlət başçıları səviyyəsində görüş yalnız danışıqlar prosesinin yekunlaşdırılması və sülh sazişinin təsdiqi üçün zəruri olacaq.
Matviyenko həmçinin qeyd edib ki, Moskva ilə Kiyev arasında danışıqlar davam etdirilməlidir. O bildirib ki, Rusiya tərəfi daim üçüncü danışıqlar raundunun keçirilməsində israr edib.
“Fikrimcə, danışıqların davam etməsi və üçüncü raundun baş tutması müsbət nəticədir,” – deyə Matviyenko əlavə edib.
Qeyd edək ki, Rusiya-Ukrayna danışıqlarının üçüncü raundu iyulun 23-də Türkiyənin İstanbul şəhərində keçirilib. Görüşdən əvvəl Moskva və Kiyev nümayəndə heyətlərinin rəhbərləri – Vladimir Medinski və Rustem Umerov arasında təkbətək söhbət baş tutub. Daha sonra təxminən 40 dəqiqə davam edən əsas danışıqlar keçirilib.
