NOCOMMENT.az redaksiyasına Cəlilabad rayonu Muğan kənd sakini Abasqulu Ağayev Məşi oğlu tərəfindən Cəlilabad rayon Məhkəməsinin hakimi Elxan Əmirəliyevin adının rüşvətxorluq və korrupsiya faktında hallanması ilə bağlı şikayət daxil olub. Redaksiya şikayətçi və qarşı tərəfi dinlədikdən sonra sözügedən şikayəti diqqətinizə təqdim edir:
“Yazıb sizə bildirərəm ki, Cəlilabad rayon Məhkəməsinin hakimi Elxan Əmirəliyev rüşvət alaraq başıma oyunlar açıb.
Cəlilabad rayonunun Muğan kəndində 62 sot həyətyanı torpağım, yanında da 68 sot pay torpağım var. Hər birinin də tam qaydasında sənədləri, yəni çıxarışı, texniki pasportu, torpaq sahəsinin plan və ölçüsü var. Yerim bərəkətli yerdir, 5 metrdən su çıxır, qara torpaqdır, nə əkirsən əla məhsul verir. Lakin mənim yerimə göz dikənlər var. Məhz torpağımın münbit və bərəkətli yerdə olmasına görə torpağıma bəzi kəndçilərim göz dikib və əlimdən almaq istəyirlər. Bu işdə onlara Cəlilabad rayon Məhkəməsinin bədnam və rüşvətxor hakimi Elxan Əmirəliyev kömək edir. Saxta sənədləri məhkəməyə doldururlar, Elxan Əmirəliyev də onların əsas götürərək iddianı qəbul eləyir. Neçə illərdi ki, Elxan Əmirəliyev məni girinc eləyib, çünki qarşı tərəfdən rüşvət alıb, çalışır işi həll etsin.
İlk əvvəl Murtuz Ağayev Mirzağa oğlu adlı kəndçim məhkəmədə iddia qaldırdı ki, guya mənim yerimdə onun 12 sot torpağı var. O məhkəməyə saxta kopya təqdim etdi. Təsəvvür edin ki, Elxan Əmirəliyev onun iddiasını kopya sənədlə qəbul elədi! Halbuki əsli olmalıdır, kopya ilə işə baxılmaz. Həmin kopya sənədlə məni 1 ildən çox məhkəmələrə çəkdi, mübahisələr oldu, davalar düşdü, xəstələnərək infarkt vəziyyətinə gəldim. Görün bu hakim puldan, rüşvətdən sarı mənim başıma nə oyunlar açdı! Tək mənim yox, rüşvət alaraq çox qurama iddialara baxıb, kopya, saxta sənədlərlə məhkəmələr aparıb, qeyri-qanuni qərarlar çıxarıb ki, bu barədə gələcəkdə sizlərə yazacam. Məni məhkəməyə verən Ağayev Murtuz Mirzağa oğlu sonra boynuna aldı ki, həmin kopya sənədi kompüterdə saxta yolla düzəldib hakimə vermişdi, çünki mən çox yerə yazdım, şükayətlər etdim, Elxan Əmirəliyev də məcbur qalıb iddianı təmin etmədi. 1 il məni aparıb gətirəndən, üzücü məhkəmə proseslərinə çəkəndən, dalbadal ekspertizalar göndərəndən, mənim ömrümü-günümü çürüdəndən sonra nəhayət iddianı təmin etmədi və məni rahat buraxdı.
Mən yalnız Apelyasiya Məhkəməsində bilmişəm ki, Elxan Əmirəliyev 1 il imiş saxta, kopya sənədlə mənim işimə baxırmış. 1 il imiş mən əbəs yerə gedib gəlirmişəm. Elxan Əmirəliyev sadəcə tamaşa qurub məni ələ salırmış. Bundan sonra əsəbdən infarkt keçirtdim.
Bundan bir neçə ay keçmiş Elxan Əmirəliyev həmin Ağayev Murtuzla əlbir olan Bayramova Qaraqız Tvox qızını yanına çağırdı, onu öyrətdi ki, iddia qaldır, təmin edəcəm. 4-5 aydır ki indi də Bayramova Qaraqız ilə məhkəmələşirəm ki, gedib gəlirik, hakim Elxan Əmirəliyev də bizə yox, qarşı tərəfə kömək edir. Təsəvvün edin ki, 65-66 yaşlı qoca arvad iddia qaldırıb ki, mənim 68 pay torpağıma verilmiş çıxarış, planı və ölçüsü ləğv edilsin. Onun burda nə marağı var? Cəlilabadda hamı bilir ki, Elxan Əmirəliyev kupça ləğv etmək üzrə mütəxəssisdir. O hamıya deyir ki, Kərəm Həsənovun, Əmlak Komitəsinin Cəlilabadda verdiyi kupçalar saxtadır. Neçə-neçə kupçanı ləğv elətdirir, Əmlak Komitəsini pis vəziyyətdə qoyur və işini pozur, insanlarda dövlət sənədinə şübhələr yaradır, ailələr arasında qırğınlar salır. Budur Elxanın fəaliyyətinin nəticəsi! Dövlət bu hakimin fəaliyyətinə hüquqi qiymət verməlidir.
Mənim kupçam var, amma Qaraqızın sənədinə fikir verin! Qaraqız da Murtuz kimi məhkəməyə saxta sənəd verib və Elxan da həmin sənədi əsas götürərək məni ittiham edir. Qaraqız məhkəməyə qeyri-qanuni yollarla alınmış sənəd verib ki, bu sənəddə göstərilir ki, guya Muğan kənd Bələdiyyəsi Şurası onlara pay torpağını verib, hətta alqı-satqı da edib. Bu harda görünüb? Azərbaycan qanunlarına görə Bələdiyyə pay torpağını alqı-satqı edə bilməz, sata bilməz, təkcə icarəyə verə bilər! Məgər Elxan bunu bilmir? Bilir, sadəcə rüşvət aldığına görə həmin sənədə əsasən “qaldırılmış” iddianı qəbul edib.
Məqsəd nədir? Elxan bayaq dediyim Ağayev Murtuzdan rüşvət almışdı, saxta kopya ilə onun düz 1 il məhkəmə işini apardı, amma aşıra bilmədi, pul batdı. İndi Qaraqızı Murtuzun yanına qoşub ki, onun vasitəsilə mənə qarşı olan işi həll etsin, “borcdan” çıxsın. Mənim çıxarışım ləğv olunanda avtomatik torpağım havada qalacaq, onda Murtuz 12 sot yox, daha çox torpağa sahiblənə biləcək. Məqsəd budur. Elxan borcunu qaytarsın!
Bunu da qeyd edim. Təsəvvür edin ki, Qaraqız o qədər arxayınlaşıb ki, həmin ərazidə ev tikib. Pay torpağında! Azərbaycanda harda görünüb ki, pay torpağında ev tikilsin? Bu qanunla qadağandır, çünki dövlət pay torpaqlarını vacib olan kənd təsərrüfatı məhsullarının əkilməsi üçün ayırır. Təyinatı da budur. Ev tikmək üçün isə ayrıca həyətyanı torpaq sahəsi verilir. Lakin Elxan bunlara göz yumur, çünki qarşı tərəfdən rüşvət alıb. Dövlət orqanları bilməlidir ki, hakim Elxan Əmirəliyev Cəlilabadda partapart Əmlak Komitəsinin verdiyi çıxarışları ləğv edir, pay torpaqlarına camaatı buraxıb evlər tikdirir. Puluna minnət. Cəlilabad Məhkəməsi açıq bazardır.
Tək mən deyiləm, Elxan çoxlu adamın kupçasını ləğv edib. Tanışım, Abışabad kənd sakini Həsənov Rəhimin ailəsinin kupçasını da ləğv etdi. Qadının qaynı idda qaldırdı ki, o vaxt mən miras ərizəsinə qol çəkməmişəm, imzam saxtadır. Elxan Əmirəliyev də imzanı ekspertizaya göndərmək əvəzinə çıxarışı ləğv etdi, nəticədə qaynı qadını 4 uşaqla evdən çıxardı, çölə tulladı. Niyə belə etdi? Çünki Elxan Əmirəliyev katibi və dəllalı Şahin Sultanzadə vasitəsilə həmin adamdan 500 manat rüşvət almışdı. Hal-hazırda iş Şirvan Apelyasiyadadır. Elxan Əmirəliyev 500 manata dövlətin verdiyi kupçaları ləğv edir.
Onu da deyim ki, Elxan Əmirəliyev əvvəl Şirvan Apelyasiyasında hakim işləyib, ona görə də qorxmur, arxayındır, bilir ki, Şirvan Məhkəməsindəki dost-tanışlara deyəcək, onlar da qətnamənin qüvvədə qalmasına “dəstək” verəcəklər. Odur ki, rahatlıqla pul alaraq kupçaların ləğv edilməsi ilə məşğul olur. Halbuki Əmlak Komitəsində əsassız kupça verilmir, sənədlər çoxlu instansiyada yoxlanılır və tam dəqiqləşəndən sonra kupça verilir. Elxan Əmirəliyev isə dövlətin kupçalaşma siyasətinə şübhələr yaradır.
Elxan Əmirəliyev artıq saxta işlərlə məşğul olmaqda professionallaşıb. O saxta, kopya sənədlərlə çoxlu işlərə baxıb. Təkcə mənə qarşı saxta sənədlərlə 2 iş aparıb. Həmin sənədləri hüquq mühafizə orqanlarına göndərmişəm ki, həqiqiliyi, düzgünlüyü araşdırılsın və cinayət işi qaldırılsın.
Dövlət orqanlarından xahiş etmişəm, o cümlədən media orqanlarından da istəyim budur ki, mənim işimlə maraqlanasanız. Aaşdırın görün hakim Elxan Əmirəliyev bu saxta, kopya, girdirmə sənədləri necə, hansı “maraqlar çərçivəsində” qəbul edib, bunların əsasında necə işə baxır?”.
Cəlilabad rayon Məhkəməsinin hakim köməkçisi Şahin Sultanzadə ilə əlaqə saxladıq.
Ş.Sultanzadə Murtuz Ağayev Mirzağa oğlunun iddiası ilə bağlı işin hazırda icraata alındığını və ekspertiza təyin olduğunu bildirdi. Pandemiya ilə əlaqədar olaraq ekspertiza torpaqlara baxış keçirə bilmir. Eyni zamanda məhkəmə Murtuz Ağayev ilə bağlı iddianın Ağayev Abasqulunun xeyrinə çəxardıb və Apelyasiya məhkəməsi də təsdiqləyib.
Cəlilabad rayon Məhkəməsinin hakimi Elxan Əmirəliyev isə Abasqulu Ağayev Məşi oğlu ilə bağlı mülki işin hələ ki, araşdırma mərhələsində olduğunu və ekspertiza təyin olduğunu bildirdi.
Məhkəmə hakimi vətəndaşın şikayətini və ittihamlarını əsassız adlandıraraq işin hələ ki, məhkəmə baxışında olduğunu qeyd etdi.
Mövzunu diqqətdə saxlayacayıq.
