Bakı Apelyasiya Məhkəməsində dələduzluqda təqsirləndirilən Eldar Səmiminin barəsində olan hökmdən verilən apelyasiya şikayəti və apelyasiya protestinə baxılıb.
NOCOMMENT-in report-a istinadən xəbərinə görə, hakim Qədim Babayevin sədrliyi ilə keçirilən prosesdə qərar elan olunub.
Qərara əsasən, birinci instansiya məhkəməsinin çıxardığı bəraət hökmü dəyişdirilmədən saxlanılıb.
Qeyd edək ki, ittihama görə, E.Səmimi “Azəriqazbank”a (“AG Bank”) qızıl-zinət əşyalarını girov qoyub kredit götürərək lombard açıb. Lakin bir müddət sonra işləri yaxşı getmədiyi üçün krediti ödəyə bilməyib. Bundan sonra bankın rəhbərliyi dəyişən zaman həmin qızılların satılaraq borcun ödənilməsinə yönəltmək istəyiblər, bu zaman qızılların bir çoxunun saxta olduğu üzə çıxıb.
Müəyyən edilib ki, E.Səmiminin banka girov olaraq qoyduğu 2 ədəd xəritə tablosu, xəncər, qılınc və portret qızıldan deyilmiş, sadəcə üz hissəsi qızıl olub. Eldar Səmimi isə həmin əşyaların saxta olduğunu bilmədiyini deyərək özünü təqsirli hesab etməyib.
Yarım milyon manata yaxın kredit götürən E.Səmimi borcunu ödəyə bilməyib. Faizlərlə birlikdə onun borcu 700 min manatı ötüb.
Onun barəsində Cinayət Məcəlləsinin 178.3.2-ci (külli miqdarda dələduzluq etmə) maddəsi ilə ittiham irəli sürülüb.
Bakı Ağır Cinayətlər Məhkəməsində məhkəmə istintaqı zamanı yenidən ekspertiza keçirilib. Ekspertin rəyinə görə, E.Səmiminin banka olan borcunun 630 min manat yox, 359 min 756 manat olması ilə bağlı rəy verilib.
Məhkəmə E.Səmiminin barəsində bəraət hökmü çıxarıb. Hökmdən narazı qalan zərərçəkmiş apelyasiya şikayəti, dövlət ittihamçısı isə apelyasiya protesti ilə Bakı Apelyasiya Məhkəməsinə müraciət edib.
Xatırladaq ki, “AG Bank” sabiq deputat Çingiz Əsədullayevə məxsus olub. E.Səmimi 1993-cü ildə “Azəriqazbank” təsis edildikdən sonra 2 ilə yaxın orada müşahidə şurasının sədri, bankın həmtəsisçilərindən biri olub. Daha sonra “Azərbaycan Beynəlxalq Bankı”nda və “Mostbank”da da çalışıb.
Mərkəzi Bankın 2020-ci il 27 aprel tarixli qərarı ilə “AG Bank”ın lisenziyası ləğv edilib və bank bağlanıb.
