Azərbaycan Mərkəzi Bankı tərəfindən açıqlanan rəsmi bülletenlərdə Azərbaycan dövlət dilinin normaları pozulur.
NOCOMMENT.az yeniavaz.com-a istinadən xəbər verir ki, Mərkəzi Bankın açıqladığı bülletenlərin birində ölkə adları “Belarusiya”, “Moldoviya” və “Hollandiya” kimi yazılıb.
Məlumat üçün bildirək ki, 30 sentyabr 2002-ci il tarixində ümummilli lider Heydər Əliyev tərəfindən təsdiq edilən “Azərbaycan Respublikasında dövlət dili haqqında” Qanunun 1.4-cü maddəsində göstərilir ki, dövlət idarələrində kargüzarlıq işləri dövlət dilində aparılır.
Qeyd edək ki, Qanunun 1.5-ci maddəsinə əsasən dövlət dilinin tətbiqinin normaları Nazirlər Kabinetin qərarı ilə müəyyən edilir. Nazirlər Kabinetinin bununla bağlı sonuncu qərarı 16 aprel 2019-cu il tarixində qəbul edilib və 3 noyabr 2020-ci il tarixli 438 nömrəli qərarı ilə müəyyən dəyişiklik edilib. Bu qərara əsasən hazırlanan “Azərbaycan dilinin orfoqrafiya normaları”nda Mərkəzi Bankın rəsmi bülletenlərdə istifadə etdiyi “Belarusiya”, “Moldoviya” və “Hollandiya” kimi adlar mövcud deyil.
Onu da bildirək ki, Mərkəzi Bankın “Belarusiya”, “Moldoviya” və “Hollandiya” olaraq “tanıdığı” ölkələr Azərbaycan dövlət dilində Belarus, Moldova və Niderland olaraq qəbul edilib.
