Miri Yusif: “Hər an ön cəbhəyə getməyə hazıram” – Müsahibəbackend

Miri Yusif: “Hər an ön cəbhəyə getməyə hazıram” – Müsahibə

  • whatsapp
  • messenger
  • telegram
  • vkontakte
  • odnoklassniki

Xalq artisti Miri Yusif Teleqraf.com-a müsahibə verib.

NOCOMMENT.az həmin müsahibəni təqdim edir:

– Cəbhə bölgəsində baş verən hadisələri necə qiymətləndirirsiniz?

– İlk növbədə xalqımı işğal olunmuş torpaqlarımızın geri qayıtması münasibətilə təbrik edirəm. Eyni zamanda, bu xalqın övladı kimi bütün Azərbaycan vətəndaşları adından cəbhədə döyüşən əsgərlərimizə və Ali Baş Komandanımıza dərin təşəkkürümü bildirirəm. Vətən uğrunda canından keçən igid şəhidlərimizə isə Allahdan rəhmət diləyirəm. Bu münaqişəyə nə vaxtsa son qoyulmalı idi. Demək, bu sonun vaxtı indi çatıb. Biz ən son qarış torpağımızı belə geri qaytaracağıq. Övladlarımıza da şanlı tarixlə birgə Bütöv Azərbaycan kimi gözəl miras qoyacağıq.

– “Ya Qarabağ, ya ölüm” mahnısını Xalq artisti Alim Qasımovla duet şəklində təqdim etdiniz. İşğaldan azad edilən hansı şəhərimizdə konsert proqramı ilə çıxış etmək istəyərsiniz?

– Dahi sənətkarımız Alim Qasımov və Xalq artisti Natiq Şirinovla ərsəyə gətirilən bu əsəri Qarabağımızın hər bir şəhərində canlı ifa edəcəyik. Fərq qoymadan hər guşəsində. Mənim ən böyük arzum Qarabağda konsert verməkdir.

– Könüllü orduya yazıldınız. Əməliyyatlar davam edir, prosesləri necə dəyərləndirirsiniz?

– Mən minlərlə orduya yazılanlardan biriyəm. Bu minlərlə insan kimi mən də Vətənin çağırışına səs verməyi özümə borc bilirəm və hər an ön cəbhəyə getməyə hazıram. Baş verənləri isə olduqca müsbət qiymətləndirirəm. Çünki bütün proseslər ordumuzun yüksək hərbi hazırlığından xəbər verir.

– Cəbrayıl rayonu, 22 kənd, bir zirvə bizdədir. Gözləntiləriniz nələrdir?

– Gözləntim, Şuşada, Xankəndində, Ağdamda, Ağdərədə, Füzulidə, Laçında, Kəlbəcərdə, Qubadlıda, Zəngilanda bayrağımızın ucaldılmasıdır.

– Ermənilər mülki əhaliyə hücum edir, Gəncəyə Bərdəyə, Xızı və Tərtərə. Bu haqda nə deyə bilərsiniz?

– Ermənilər bu hərəkətləri ilə heç kimi heyrətləndirmirlər. Hər zamanki mənfur, qorxaq, təcavüzkar üzlərini bir daha nümayiş etdirirlər. Sudan çıxmış balıq kimi çabalayırlar. Amma anlamırlar ki, rüzgarı əkən fırtına biçəcək!

– Qardaş Türkiyənin dəstəyini necə qiymətləndirirsiniz?

– Ulu öndərimiz dediyi kimi “Bir millət, iki dövlətik”. Bu müdrik kəlamı da hər iki ölkə daima öz siyasəti və bir-birinə dəstəyi ilə sübut edir. Bu gün də Türkiyə yanımızdadır və bu, bizə həm mənəvi güc verir, həm də qürurlandırır.

– Xarici kanalları izləyirsinizmi? Necə düşünürsünüz, ölkəmizə qarşı adekvat mövqe nümayiş etdirirlərmi?

– Bu, Böyük Vətən müharibəsidir və burada ön cəbhə ilə bərabər, arxa cəbhədə də informasiya savaşı aparılır. Biz hər zaman doğrunun, gerçəkliyin carçısı olaraq qalırıq. Ancaq təəssüf ki, bir sıra satılmış və ikili standartlara qulluq edən xarici media qurumları və şəxsləri özlərini görməzliyə vururlar. Nə edirlər etsinlər, bir həqiqət var – Qarabağ Azərbaycandır! Dünya bunu istəsə də, istəməsə də birmənalı şəkildə qəbul etməlidir. Tarix həmişə hər şeyi öz yerinə qoyur…