Misir Qəzzada təhlükəsizlik qüvvələri üçün yüzlərlə fələstinliyi hazırlamağa başlayıb. Bu, bir sıra ərəb dövlətlərinin müharibədən sonrakı Qəzza sektorunun idarə edilməsində HƏMAS hərəkatının iştirak etməməsi istiqamətindəki səyləri çərçivəsində həyata keçirilir.
NOCOMMENT.az xəbər verir ki, bu barədə The Wall Street Journal (WSJ) ərəb rəsmiləri ilə aparılan müsahibələrə istinadla məlumat yayıb.
Qəzetin məlumatına görə, potensial təhlükəsizlik qüvvələrinin əməkdaşları fələstinliləri Misirdə hərbi təlim müəssisələrində hazırlayır. Təxmin edilir ki, 10 min nəfərlik təhlükəsizlik qüvvələri İordaniya, Misir, Körfəz ölkələri və Fələstin Muxtariyyətinin təhlükəsizlik xidmətlərinin nümayəndələrindən ibarət olacaq.
Nəşr bildirir ki, fələstinlilərin Qəzzada təhlükəsizliyin təmin edilməsində HƏMAS-ın yerini alması üçün hazırlanması səyləri, bir çox ərəb dövlətlərinin bu hərəkatın bölgə həyatında iştirakına qarşı çıxmasından sonra sürətlənib. İyul ayında Ərəb Dövlətləri Liqasının üzvləri ilk dəfə açıq şəkildə HƏMAS-ı silahsızlanmağa və Qəzza sektorunun idarəçiliyini dayandırmağa çağırıblar.
