Litva və Finlandiya Ottava Konvensiyasından çıxdıqdan sonra özləri və Ukrayna üçün piyada əleyhinə minalar istehsal edəcəklər.
NOCOMMENT.az xəbər verir ki, bu barədə Reuters agentliyi NATO rəsmilərinə istinadən məlumat yayıb.
NATO ölkələri, həmçinin Polşa, Latviya və Estoniya piyada əleyhinə minaların istifadəsini qadağan edən konvensiyadan çıxmaq niyyətində olduqlarını bəyan ediblər. Səlahiyyətlilər altı aylıq geri çəkilmə prosesi başa çatdıqdan sonra istehsalın başlaya biləcəyini deyirlər.
“Biz tank əleyhinə minalara, eləcə də piyada əleyhinə minalara yüz milyonlarla avro xərcləyəcəyik. Bu, əhəmiyyətli məbləğ olacaq”, – Litvanın müdafiə nazirinin müavini Karolis Aleksa bildirib. O əlavə edib ki, “on minlərlə piyada əleyhinə mina və ya daha çox” sifariş veriləcək.
Finlandiya parlamentinin müdafiə komitəsinin sədri Heikki Otto da agentliyə bildirib ki, Finlandiyanın təchizat təhlükəsizliyini təmin etmək üçün özünün piyada əleyhinə mina istehsalı olmalıdır, çünki bu, “yüksək effektiv və çox sərfəli silah sistemidir”.
Bundan əvvəl üç Baltikyanı ölkə BMT-ni piyada əleyhinə minaları qadağan edən konvensiyadan çıxdıqları barədə xəbərdar etmişdilər . İyunun 27-də Latviya, Estoniya və Litva geri çəkilmək barədə sənədlər təqdim ediblər. Geri çəkilmə qərarı altı aydan sonra qüvvəyə minəcək. Latviya qeyd edib ki, piyada əleyhinə minaların istehsalı ölkənin və onun əhalisinin mühafizəsini gücləndirəcək. Estoniya Xarici İşlər Nazirliyi onu da qeyd edib ki, Avropada təhlükəsizlik problemlərinə görə ölkə öz milli müdafiəsini gücləndirmək istəyir.
