Mədəniyyət Nazirliyi Azərbaycanda fəaliyyət göstərən bir qrup kino istehsalçısı və kino sahəsində çalışan sənət adamlarının peşə fəaliyyətlərini icra etməklərinə ciddi maneələr yaradılması barədə bəyanatlarına münasibət bildirib.
NOCOMMENT.az xəbər verir ki, Nazirlikdən apa-nın sorğusuna cavab olaraq bildirilib ki, Nazirlər Kabinetinin 2006-cı il 6 iyul tarixli 165 nömrəli qərarı ilə təsdiq edilmiş “Filmlərin yayımı və nümayişi Qaydaları”nın tələblərinə əsasən Azərbaycan Respublikasının ərazisində yayımına və kütləvi nümayişinə icazə verilən bütün filmlər Mədəniyyət Nazirliyində qeydə alınır və filmlərin dövlət reyestrinə daxil edilir və onlara həmin Qaydaların əlavəsinə uyğun vahid formalı yayım vəsiqəsi verilir.
“Sözügedən Qaydalarda qeyd olunan meyarlara uyğun filmlərin seçilməsi, reyestrə daxil edilməsi və onlara yayım vəsiqəsinin verilməsi üçün ekspert mövqeyinə zərurət olduğundan Nazirlik yanında kinorejissor, sosioloq, psixoloq, jurnalist, dramaturq və müvafiq sahə üzrə təcrübəyə malik olan bir sıra digər mütəxəssislərdən ibarət tərkibdə Ekspert Şurası yaradılmışdır.
Şura filmlərin qanunvericilikdə müəyyən edilmiş meyarlara uyğunluq baxımından qiymətləndirilməsinə dair peşəkar rəy verir və həmin rəy əsasında müvafiq filmin reyestrə daxil edilməsi və ona yayım vəsiqəsinin verilməsinə dair Nazirlik tərəfindən qərar qəbul edilib.
Bir daha diqqətinizə çatdırmaq istəyirik ki, burada hansısa senzuranın tətbiqindən söhbət gedə bilməz”, – cavabda vurğulanır.
