Ermənistan Baş naziri Nikol Paşinyan 2026-cı ildə keçiriləcək parlament seçkilərində “Vətəndaş Müqaviləsi” partiyasından yenidən Baş nazir postuna namizəd olacağını rəsmən bəyan edib.
Paşinyanın bu açıqlaması həm Ermənistanın daxili siyasi gündəmində, həm də Cənubi Qafqaz regionunda yenidən ciddi müzakirələrə səbəb olub.
Paşinyan hakimiyyəti son illərdə Ermənistanın xarici siyasətində kəskin kurs dəyişikliyi edərək, Rusiyadan uzaqlaşıb Qərbə inteqrasiya xəttinə üstünlük verir. Bu isə 2026-cı il seçkilərini təkcə daxili siyasi proses yox, həm də bölgənin geopolitik gələcəyi üçün mühüm hadisəyə çevirir.
Hazırda əsas suallar bunlardır: Paşinyanın növbəti dəfə namizəd olması Ermənistanın siyasi arenasında balansı necə dəyişəcək? Bu qərar Ermənistan-Azərbaycan münasibətlərinə, xüsusilə gərginliyin azalması və mümkün sülh prosesinə hansı təsirləri göstərə bilər? Eyni zamanda seçkidən sonra formalaşacaq hökumətin Ermənistanın regional mövqeyinə və beynəlxalq siyasətinə təsiri necə qiymətləndirilə bilər?
Məsələ ilə bağlı NOCOMMENT.az-a danışan siyasi ekspert Elçin Xalidbəyli qeyd edib ki, Ermənistanda keçiriləcək növbəti parlament seçkiləri Cənubi Qafqazdakı geopolitik vəziyyətə ciddi təsir göstərə bilər:
“Hazırda Ermənistanda Paşinyan hakimiyyəti Rusiyadan uzaqlaşaraq Qərbə inteqrasiya xətti yürüdür. Bu səbəbdən Rusiya özünün Cənubi Qafqazdakı yeganə dayağını nəzarətdə saxlamaq üçün Paşinyan hakimiyyətinin devrilməsində maraqlıdır. Artıq seçki ərəfəsində bu istiqamətdə müəyyən ssenarilərin işə salındığı da müşahidə edilir. Təbii ki, Paşinyan hakimiyyəti bu təhlükəni yaxşı anlayır. Buna görə də Rusiyanın Ermənistandakı təsir dairəsinə daxil olan bütün qüvvələrə — xüsusilə erməni kilsəsinə, oliqarxiyaya və radikal revanşist düşərgəyə qarşı ciddi mübarizə aparır.
Müşahidələr göstərir ki, Paşinyan hakimiyyəti Rusiyanın Ermənistandakı agentura şəbəkəsinə ciddi zərbələr vuraraq onların imkanlarını xeyli məhdudlaşdırıb. Bu faktor növbəti seçkilərdə Paşinyanın yenidən qələbə qazanması ehtimallarını daha real göstərir”.
Xalidbəylinin sözlərinə görə, əsas məqamlardan biri də odur ki, bu seçkilərdə qələbə Nikol Paşinyan üçün həm siyasi, həm də şəxsi baxımdan böyük əhəmiyyət daşıyır:
“Çünki seçkilərdə məğlubiyyət onun hakimiyyəti itirməsi və ağır duruma düşməsi ilə nəticələnə bilər. Üstəlik, böyük ehtimalla seçkiləri uduzacağı təqdirdə Rusiyaya bağlı yeni hakimiyyət Paşinyanın həbsinə nail olmağa çalışacaq. Hətta seçkilərdən sonra ölkədən çıxmaq imkanı tapa bilməsə, Paşinyanın həyatının qalan hissəsini həbsxanada keçirməsi də istisna olunmur. Məhz buna görə Paşinyanın yenidən baş nazir postuna iddia etməsi və seçkilərdə qələbə üçün maksimum səylə çalışması təəccüblü deyil. Bu, onun üçün həm siyasi, həm də həyat xarakterli bir hədəfdir”.
Ekspertin sözlərinə görə, əgər Paşinyan hakimiyyəti seçkilərdə qalib gələrsə, Ermənistanın Rusiyadan uzaqlaşmaq və Qərbə yaxınlaşmaq siyasəti əvvəlki kimi davam edəcək:
“Bununla paralel olaraq, Zəngəzur dəhlizinin açılması, Ermənistan konstitusiyasının dəyişdirilərək Azərbaycana qarşı ərazi iddialarından imtina olunması və bundan sonra yekun sülh sazişinin imzalanması mümkün ola bilər.
Bu isə bütövlükdə Cənubi Qafqazda sülh və sabitlik dövrünün başlanmasına, region dövlətlərinin iqtisadi inkişaf imkanlarının genişlənməsinə şərait yaradacaq.
Lakin əgər Rusiyaya bağlı qüvvələr hakimiyyətə gələrsə, Kremlin təlimatı ilə Ermənistanın Azərbaycanla yekun sülh sazişinin imzalanmasından yayınması tamamilə mümkündür.
Xüsusilə Rusiyayönlü siyasi dairələr konstitusiya dəyişikliklərinin əleyhinə çıxır. Bu isə onların hakimiyyətdə olduğu təqdirdə sülh prosesinin dalana dirənməsi deməkdir. Digər tərəfdən, Zəngəzur dəhlizi Moskvanın da maraqlarına uyğun olsa da, Rusiyaya bağlı qüvvələrin hakimiyyətə gəlməsi bu layihənin də qarşısını ala bilər.”
Elçin Xalidbəyli sonda bildirib ki, bütün bunlar göstərir ki, Paşinyan hakimiyyətinin dəyişməməsi və onun təmsil etdiyi siyasi komandanın növbəti parlament seçkilərində qalib gəlməsi həm Ermənistan, həm də bütövlükdə region üçün böyük əhəmiyyət kəsb edir.
