Ermənistanın daxili işlər naziri və onun müavinləri gələn həftə təyin olunacaqlar.
NOCOMMENT Sputnik Armenia-ya istinadən xəbər verir ki, bu barədə cümə axşamı Ermənistanın baş naziri Nikol Paşinyan hökumətin iclasında bildirib.
Yanvarın 5-də Nazirlər Kabineti yeni yaradılan Daxili İşlər Nazirliyinə üç bölmənin: polis (müstəqil qurum kimi mövcud olub), xilasetmə xidməti (Fövqəladə Hallar Nazirliyindən) və miqrasiya xidmətinin (Ərazi İdarəetmə və İnfrastruktur Nazirliyindən) verilməsi layihəsini təsdiqləyib.
Qərar Daxili İşlər Nazirliyinin (2003-cü ildə ləğv edilib) yenidən yaradılmasını tənzimləyən daha əvvəl təsdiq edilmiş qanunvericilik dəyişiklikləri paketi əsasında qəbul edilib.
Bununla bağlı Paşinyan qeyd edib ki, nazirliyin strukturunun formalaşdırılması və ona səlahiyyətlərin verilməsi mərhələli şəkildə həyata keçiriləcək və Fövqəladə Hallar Nazirliyi daha 4 aya yaxın işləyəcək. Bu, dövlət aparatının işində pozulmaların qarşısını almağa kömək edəcək.
Nazirlik asayişi təmin edən qüvvələr üçün siyasətin formalaşmasına imkan verəcək. Hökumət başçısı əlavə edib ki, əvvəllər bu işi Ədliyyə Nazirliyi həyata keçirirdi.
Polis və xilasetmə xidmətinin rəisləri eyni vaxtda daxili işlər nazirinin müavinləri olacaqlar. Daha iki müavin vətəndaş vəziyyəti ilə bağlı işləyəcək (onlar Daxili İşlər Nazirliyinin struktur bölmələri üzrə siyasətin hazırlanması ilə məşğul olacaqlar).
Polis əməkdaşları və xilasedicilər üçün tezliklə sertifikatlaşdırma prosesi başlayacaq. Sertifikatlaşdırmadan uğurla keçənlərin əməkhaqqı artırılacaq. Ermənistan hakimiyyəti ilk attestasiyanı bu ilin aprel-may aylarında keçirmək istəyir.
