Pentaqonun sözçüsü bildirib ki, Birləşmiş Ştatlar Rusiya qüvvələrinin Nigerdəki Amerika qüvvələri ölkədən çıxarıldıqdan sonra onların yerini almasını gözləmir.
NOCOMMENT.az xəbər verir ki, bu barədə RİA Novosti məlumat yayıb.
Xüsusi brifinq zamanı rəsmi qeyd edib ki, Niger Müdafiə Nazirliyinin nümayəndələri öz ərazilərində xeyli sayda xarici hərbçi görmək istəmədiklərini bildiriblər. O, həmçinin əlavə edib ki, antiterror imkanlarının Rusiya qoşunlarına veriləcəyini güman etmir.
ABŞ ordusunun sözçüsü rus qoşunlarının Nigerdə olması ilə bağlı sualları cavablandırmaqdan yayınıb və qeyd edib ki, paytaxtda Rusiya qüvvələrinin olması ehtimalı barədə xəbərlər olsa da, onların dəqiq yerini təsdiq edə bilməyib. Amerika qüvvələri tərəfindən evakuasiya edilməyəcək Amerika texnikasının Rusiya ordusuna mümkün təhvil verilməsi ilə bağlı sualı cavablandıran rəsmi Niger nümayəndələrinin bu texnikadan özləri istifadə etmək niyyətlərini ifadə etdiklərini bildirib.
Niger və ABŞ müdafiə nazirlikləri 2024-cü il sentyabrın 15-dək ABŞ qoşunlarının ölkədən çıxarılmasını başa çatdırmaq barədə razılığa gəliblər. Hər iki tərəf bu proses zamanı ABŞ hərbi qulluqçularının təhlükəsizliyini təmin edəcək və ümumi maraq doğuran sahələrdə əməkdaşlığı davam etdirəcək.
