Portuqaliyada korrupsiya qalmaqalı fonunda Baş nazir Antoniu Koştanın istefa verməsi qərarından sonra erkən parlament seçkiləri keçiriləcək.
NOCOMMENT.az report-a istinadən xəbər verir ki, vətəndaşlar Respublika Assambleyasına (birpalatalı parlament) 230 deputat seçməli olacaqlar.
Seçki məntəqələri yerli vaxtla saat 08:00-da (Bakı vaxtı ilə 12:00) açılacaq və saat 19:00-a qədər (Bakı vaxtı ilə 23:00) fəaliyyət göstərəcək. İlkin nəticələr gecə açıqlanacaq.
Səsvermə əvvəlcə 2026-cı ilə təyin edilmişdi. Bununla belə, 2023-cü ilin noyabrında Portuqaliya prezidenti Marselu Rebelu di Souza parlamenti buraxmaq və növbədənkənar seçkilər təyin etmək niyyətində olduğunu açıqlayıb. Qərar 2015-ci ildə baş nazir olmuş sosialist Koştanın yerli prokurorların litium hasilatı və hidrogen istehsalı layihələrində mümkün pozuntularla bağlı araşdırması fonunda istefa verdiyini elan etməsindən sonra verilib.
Portuqaliya polisi Koştanın rəsmi iqamətgahı da daxil olmaqla onlarla axtarış aparıb. Sözügedən işlə bağlı baş nazir administrasiyasının rəhbəri vəzifəsində çalışmış Vitor Eşkariya saxlanılmışdı. Eyni zamanda, respublika prokurorluğu Koştanın özünə qarşı heç bir rəsmi ittiham irəli sürməyib.
