Rusiya prezidenti Vladimir Putin Misir lideri Əbdülfəttah əs-Sisi ilə telefon danışığı zamanı Misir dövlətinin və bir sıra digər ölkələrin İsrail və Fələstinin HƏMAS hərəkatı arasında razılaşmanın asanlaşdırılması üçün vasitəçilik səylərini yüksək qiymətləndirib.
NOCOMMENT.az xəbər verir ki, bu barədə Kremlin mətbuat xidməti məlumat yayıb.
Yanvarın 21-də əs-Sisi Putinlə telefon danışığı aparıb. Misir liderinin rəsmi nümayəndəsi Məhəmməd əl-Şinavinin sözlərinə görə, söhbət zamanı Misir və Rusiya başçıları iki dövlət arasında əlaqələrin möhkəmləndirilməsi yollarını müzakirə ediblər. Tərəflər həmçinin Yaxın Şərqdəki vəziyyəti, o cümlədən Qəzza zolağında atəşkəs razılaşmasını, Livan və Suriyadakı mövcud vəziyyəti müzakirə ediblər.
Yanvarın 19-da Qəzza zolağında atəşkəs rejimi qüvvəyə minib. Döyüşlər İsrail və Fələstin hərəkatı arasında razılaşmanın bir hissəsi kimi dayandırılıb.
