Qış mövsümünün yaxınlaşması paytaxt təsərrüfatının qarşısında ciddi vəzifələr qoyur. Havanın qəfil dəyişməsi, yağıntıların intensivləşməsi, xüsusilə də qar və leysan yağışlarının yaratdığı təhlükələr hər il böyük risklər yaradır.
Xatırladaq ki, ötən il güclü yağışlar nəticəsində bəzi körpü və keçidlərin su altında qalması faciəvi hadisəyə, insan itkisinə səbəb olmuşdu. Bu kimi halların təkrarlanmaması üçün bu il dövlət qurumları və yerli icra strukturları hazırlıq tədbirlərini daha da gücləndirib.
Hazırda əsas suallar belədir: qarşıdan gələn qışa hazırlıq necə aparılır, ötən illərin problemləri aradan qaldırılıbmı və hansı əlavə tədbirlər görülür?
Bakı Şəhər İcra Hakimiyyətindən NOCOMMENT.az-a verilən məlumata görə, qış mövsümünə hazırlıq çərçivəsində paytaxt rayonlarında təsdiq edilmiş tədbirlər planlarına uyğun olaraq mövsümə, xüsusilə qarlı günlərə hazırlıq işləri tam başa çatdırılıb. Şəhərin və rayon kommunal xidmətlərinin xüsusi təyinatlı texnikaları hazır vəziyyətə gətirilib, əlavə təhlükəsizlik tədbirləri görülüb.
Görülən işlərə nəzarəti gücləndirmək üçün Bakı Şəhər İcra Hakimiyyəti tərəfindən hər bir rayona cavabdeh şəxs təyin edilib. Qarlı havalara hazırlıq tədbirlərinin vəziyyəti son olaraq Suraxanı, Səbayel və Nəsimi rayonlarında müzakirə olunub. Müşavirələrdə icra hakimiyyətinin məsul şəxsləri, rayon rəhbərləri, kommunal-təsərrüfat qurumları, digər aidiyyəti strukturlar və özəl sektor nümayəndələri iştirak ediblər. Toplantılarda hər bir sahə rəhbərinin hesabatı dinlənilib.
Qeyd edilib ki, bütün təşkilatlar mövsümə hazırlıq prosesində fəal iştirak etməli, yağıntılar zamanı bitişik ərazilərin qar və buzdan təmizlənməsi üçün müvafiq tədbirlər görməlidirlər. Qar təmizlənməsi işlərinə yalnız kommunal qurumların deyil, həm də idarə, müəssisə, bələdiyyə və özəl sektorun mövcud texnikalarının cəlb olunması qərara alınıb. Bununla yanaşı, ictimai iaşə obyektlərinin və özəl müəssisələrin rəhbərlərinə, eləcə də ictimaiyyət nümayəndələrinə öz ərazilərinin təmizlənməsində aktiv iştirak etmələri ilə bağlı çağırış edilib.
Bəs körpülərin baxımı və subasmaya görə məsuliyyəti hansı qurum daşıyır?
Nəqliyyat üzrə ekspert, hüquqşünas Ərşad Hüseynov NOCOMMENT.az-a bildirib ki, körpülərin, yeraltı və yerüstü keçidlərin təhlükəsizliyi, həmçinin yağıntılar nəticəsində yaranan subasma hallarının qarşısının alınması bir neçə qurumun birgə fəaliyyətini tələb edir:
“Adətən bu infrastruktur obyektlərinin texniki baxımı və istismarı Azərbaycan Avtomobil Yolları Dövlət Agentliyi (AAYDA) tərəfindən həyata keçirilir. Lakin yağış sularının yığılması, drenaj və yağış-kanalizasiya sistemlərinin işlək vəziyyətdə saxlanması Bakı Şəhər İcra Hakimiyyəti və “Bakı Su Kanal”ın məsuliyyət dairəsinə daxildir”.
“Bu səbəbdən ötən il yaşanan subasma hadisələrindən sonra məsul qurumlar arasında koordinasiya gücləndirilib, xüsusilə problemli sayılan keçid və körpülərin drenaj sistemlərində təmir-bərpa işləri aparılmalıdır. Yağış sularının toplanması üçün əlavə kanallar açılmalı, mövcud xətlər lil və çöküntülərdən təmizlənməli, nasos stansiyalarının gücü artırılmalıdır” , – deyə ekspert bildirib.
Bundan başqa, BŞİH-dən məsələ ilə bağlı bildirilib ki, qış mövsümü ərzində körpülərə nəzarət daha da sıxlaşdırılacaq – kritik nöqtələrdə növbətçilik gücləndiriləcək, hər hansı su toplanması halında operativ müdaxilə üçün briqadalar hazır vəziyyətdə saxlanılacaq. Məqsəd həm nəqliyyatın təhlükəsiz hərəkətini təmin etmək, həm də ötən ilki kimi fəsadların təkrarlanmamasıdır.
Hüquqşünas Əkrəm Həsənov saytımıza bildirib ki, ictimai infrastrukturun — o cümlədən körpülərin, keçidlərin və drenaj xətlərinin təhlükəsiz istismarı dövlət qurumlarının birbaşa öhdəliyidir:
“Əgər subasma, texniki nasazlıq və ya təhlükə yaradan vəziyyət dövlət qurumlarının səhlənkarlığı nəticəsində baş verirsə, bu, həm inzibati, həm də zərərin nəticəsindən asılı olaraq cinayət məsuliyyətinə səbəb ola bilər. Mövcud qanunvericiliyə əsasən, balansında infrastruktur olan təşkilat həmin obyektin təhlükəsizliyini təmin etməlidir. Əgər vaxtında baxış keçirilməyibsə və subasma nəticəsində ziyan dəyibsə, məsuliyyət bu qurumun üzərinə düşür. Əgər ötən il olduğu kimi, su basma hadisəsi insan ölümü ilə nəticələnərsə, istintaq texniki baxımın həyata keçirilib-keçirilmədiyini araşdırır və vəzifəli şəxslər Cinayət Məcəlləsinə uyğun məsuliyyətə cəlb oluna bilər.”
Hüquqşünasın fikrincə, drenaj və körpü baxışı üzrə məsuliyyət müxtəlif qurumlar arasında bölündüyü üçün subyektlərin öhdəlikləri şəffaf müəyyən edilməlidir ki, hər hansı hadisədə konkret cavabdeh tərəf dəqiq müəyyən olunsun.
