Baltik donanmasının gəmiləri “Qərb-2025” birgə strateji təlimləri çərçivəsində şərti düşmənin hava hücum vasitələrini dəf etmə təlimi keçirib.
NOCOMMENT.az xəbər verir ki, bu barədə jurnalistlərə Rusiya Müdafiə Nazirliyi məlumat verib.
Nazirlik bildirib: “Gəmilərin hava hücumundan müdafiə postlarının heyətləri naməlum hava hədəflərinin aşkarlanması və şərti düşmənin hava hücum vasitələrinə qarşı müdafiə üzrə təlim keçib”.
Həmçinin qeyd olunub ki, növbətçi gəmi radionəzarət vasitələri ilə şərti düşmənin aviasiyasını aşkarlayıb. Təlim zamanı Su-30SM, Su-24M və Mi-8 helikopterləri müxtəlif istiqamətlərdən və fərqli hündürlükdə hərəkət edərək donanma qüvvələrinin mövqelərinə “hücum” simulyasiya ediblər. Gəmilər hava hücumundan müdafiə vasitələrini tətbiq etməyə hazır vəziyyətə gətirilib, döyüş heyətləri isə hava vəziyyəti ilə bağlı məlumatların qəbul və təhlilinə başlayıb.
Rusiya və Belarus silahlı qüvvələrinin “Qərb-2025” birgə strateji təlimləri 12 sentyabrda başlayıb. Təlimlərin məqsədi iki ölkənin İttifaq Dövləti çərçivəsində hərbi təhlükəsizliyi təmin etmə qabiliyyətini və mümkün aqressiyanı dəf etməyə hazırlığını yoxlamaqdır.
