Azərbaycan Demokratiya və Rifah (ADR) Partiyasının sədri Qubad İbadoğlu deputat Cavanşir Feyziyevlə bağlı Baş Prokurorluğa müraciət edib.
NOCOMMENT xəbər verir ki, bu barədə Q.İbadoğlu özünün feysbuk səhifəsində məlumat yayıb: “London məhkəməsinin qərarı ilə azərbaycanlı deputat Cavanşir Feyziyevin həyat yoldaşı, oğlu və qardaşı oğluna məxsus bank hesablarında olan 15,3 milyon funt sterlinq vəsaitin 5,6 (13 milyon AZN) milyon funt sterlinqini çirkli pul hesab edilərək müsadirə olunandan sonra yazdıqlarına görə təhqirə məruz qalan jurnalistlər həmrəylik nümayiş etdirərək, Cavanşir Feyziyyevə daha ağır təhqirlə cavab verirlər.
Xatırladım ki, məhkəmə qərarı xəbəri yayılandan dərhal sonra Cavanşir Feyziyev Milli Şuranın sədri Cəmil Həsənlini və məni ağır ifadələrlə təhqir etmiş və bizə böhtan atmışdır. Mən, Azərbaycan Demokratiya və Rifah Partiyasının sədri olaraq hüquqi dövlət quruculuğundan çıxış edərək, Cavanşır Feyziyevin əməlinin AR CM-nin 147 (Böhtan), 148 (Təhqir) maddələri ilə cinayət məsuliyyəti yaratdığını nəzərə alaraq hüquqi qiymət vermək üçün Baş Prokurorluğa, siyasi qiymət vermək üçün isə Milli Məclisin İntizam Komissiyasına rəsmi müraciət göndərmişəm, cavab gözləyirəm” .
