Fransa ilə Azərbaycan arasında münasibətlər getdikcə pisləşir. Bunun əsas səbəbi rəsmi Parisin Bakı və bütövlükdə Cənubi Qafqazla bağlı riyakar mövqeyidir. Bu riyakarlığın ən bariz nümunələrindən biri kimi Yelisey sarayının Bakıda keçirilən BMT-nin İqlim Dəyişikliyi üzrə çərçivə Konvensiyasının Tərəflər Konfransının 29-cu sessiyasına (COP29), daha doğrusu, Azərbaycanın ev sahibliyinə kölgə salmaq cəhdidir.
NOCOMMENT.az report-a istinadən xəbər verir ki, sözügedən tədbir başlamazdan əvvəl Fransa müxtəlif təxribatçı addımlar atırdı: gah regionda süni şəkildə gərginlik yaratmağa çalışır, gah Azərbaycanda insan azadlıqlarının məhdudlaşdırıldığını iddia edir, gah da vətəndaşlarına bölgəyə səfər xəbərdarlığı edirdi.
Yeri gəlmişkən, xatırladaq ki, Türkiyənin “Haber Global” telekanalının noyabrın 20-də hazırladığı süjetlərdən birində də bu məsələyə toxunuldu. Göstərildi ki, Azərbaycana düşmənliyi bitməyən Fransa COP29-u “baltalamaq” üçün bütün təxribatlardan istifadə edir.
Qeyd olunub ki, qlobal kəşfiyyat xəbər yayım orqanı “Intelligence Online”ın məlumatına görə, Fransanın əsas lobbiçilik subyektlərindən biri olan “Havas” COP29-u “baltalamaq” üçün işə başlayıb: “Azərbaycanın neft ölkəsi olduğu əsas gətirilərək COP29-a ev sahibliyi etməyin düzgün olmaması barədə Avropa, ABŞ və Rusiyada lobbiçilik fəaliyyəti həyata keçirilir. Amma Azərbaycanın Cənubi Qafqazdakı təsirli diplomatiyası və iqtisadi əlaqələri nəticəsində Fransa istədiyini əldə edə bilmədi”.
Bu, Yelisey sarayının Azərbaycanla bağlı qərəzli mövqeyinin sadəcə bir nümunəsidir. Əslində isə məsələ daha dərindir. Belə ki, Fransadakı Emmanuel Makron hakimiyyəti bölgəyə soxulmaq üçün təsir göstərə bildiyi Ermənistandan istifadə edərək gərginlik yaradır. Bu isə son nəticədə Fransa- Azərbaycan ikitərəfli əlaqələrinə təsir edir.
Bütün bunlarla əlaqədar Fransanın Azərbaycandakı səfiri Ann Buayon noyabrın 20-də Xarici İşlər Nazirliyinə (XİN) çağırılıb. Görüş zamanı, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ərəfəsində və sessiya zamanı Fransanın Azərbaycan sədrliyinin hədəf alınmasına etiraz bildirilib.
“Bu xüsusda, Azərbaycanın ev sahibliyi etdiyi BMT-nin bu mötəbər tədbirinin boykot edilməsinə çağırışların, bir çox dövlət başçılarının tədbirə qatılmamağa Fransa tərəfindən təşviq edilməsinin, eləcə də COP29 konfransı başlayan zaman Fransanın xüsusi səyləri ilə Avropa Parlamentində sədrliyimizi əsassız şəkildə tənqid edən, ümumilikdə isə iqlim dəyişmələri ilə mübarizə sahəsində qlobal səylərimizə qarşı çevrilmiş qətnamənin qəbulunun qəbuledilməz olduğu vurğulanıb”, – məlumatda qeyd olunub.
Bundan başqa, səfirin diqqətinə Ermənistanın geniş şəkildə silahlanmasını həyata keçirən, militarizmi və revanşizmi təşviq edən Fransanın addımlarının sülh prosesinə zərbə olduğu çatdırılıb.
“Azərbaycanı hədəf alan, eləcə də normallaşma prosesini təhlükə altına salan bu addımlara son qoyulması Fransa tərəfindən təkidlə tələb olunub”, – XİN-in məlumatında deyilir.
Səfirin nazirliyə çağırılması əslində Fransaya vaxtında verilmiş mesaj və xəbərdarlıq idi. Belə ki, rəsmi Paris Bakı ilə ikitərəfli münasibətlərin pisləşməsinin səbəbkarı və günahkarı olduğunu anlamalıdır.
Məlum olduğu kimi, bu gün Bakı ilə İrəvan arasında sülh imkanı heç vaxt olmadığı qədər çoxdur. Tərəflər arasında münasibətlər tədricən normallaşır. Bu isə bölgədə dağıdıcı maraqları olan Fransanı narahat edir. Ermənistanla hərbi əlaqələrin inkişafı, silahlandırılma siyasəti və regionda yeni toqquşma yaratma cəhdləri məhz mümkün sülhün qarşısını almağa hesablanıb.
Fransanın mövcud iqtidarının problemi təkcə Azərbaycan və regionla bağlı deyil.
Rəsmi Parisin neokolonialist siyasəti, ölkədə demokratik ənənələrin pozulması, o cümlədən polis zorakılığı, bir sözlə, daxili və xarici siyasətdəki uğursuzluqlar bu ölkənin bütün dünyadakı nüfuzunu azaldır.
Təsadüfi deyil ki, Fransada solçular Makronun impiçmenti prosedurunu yenidən başladıblar. Bundan başqa, son məlumata görə, fransızların yarıdan bir qədər çoxu – 51 %-i Mişel Barnye hökumətinə etimadsızlıq səsverməsinin lehinədir. Bu, o deməkdir ki, hətta yerli xalq da Yelisey Sarayından narazıdır.
Deyirlər ki, qozbeli qəbir düzəldər. Fransa hakimiyyətinin Cənubi Qafqaz və Azərbaycanla bağlı siyasəti də, yəqin ki, dəyişməyəcək. Qeyri-obyektiv yanaşmanın, qərəzli mövqeyin bundan sonra da davam edəcəyi gözlənilir. Məhz Parisin bu siyasəti nəticəsində gələcəkdə ikitərəfli əlaqələrdə gərginliyin daha da artması mümkündür. Bu, Yelisey sarayının bölgədə olmaq imkanlarını minimuma salmaqla yanaşı, həm də indiki çətin geosiyasi vəziyyətdə Fransanın xarici siyasət kursu üçün problemlər yaradacaq. Ən azından ona görə ki, Azərbaycan Avropanın enerji təhlükəsizliyində mühüm rol oynayan oyunçulardandır.
