Qərb dövlətlərinin son vaxtlar Rusiyaya qarşı tətbiq etdiyi sanksiyaların bir qismi Ukrayna münaqişəsi həll edildikdən sonra ləğv edilə bilər.
NOCOMMENT.az xəbər verir ki, bunu ABŞ dövlət katibi Marko Rubio Rusiya və Amerika nümayəndə heyətləri arasında Ər-Riyadda keçirilən danışıqlardan sonra bildirib.
Onun sözlərinə görə, 2022-ci ilin fevralında başlayan hərbi əməliyyatlar nəticəsində tətbiq edilən məhdudlaşdırıcı tədbirlər müzakirəyə səbəb olacaq. Eyni zamanda, Avropa İttifaqı da sanksiyalar siyasətinə yenidən baxmalı olacaq.
“Bütün bunlar [Ukraynadakı] bu münaqişənin nəticəsidir. Bu münaqişə nəticəsində tətbiq edilən sanksiyalar var. Ona görə də demək istərdim ki, istənilən münaqişəyə son qoymaq üçün bütün tərəflərin güzəştə getməsi lazımdır”, – dövlət katibi bildirib.
Rubio əlavə edib ki, digər ölkələr də oxşar qərarlar verə bilər.
Fevralın 18-də Səudiyyə Ərəbistanında Rusiya və ABŞ nümayəndələri arasında görüş baş tutub. Söhbət bir sıra iqtisadi layihələr üzrə əməkdaşlığın bərpasına, o cümlədən Ukrayna nizamlanması üzrə mümkün təmasların hazırlanmasına və iki prezident arasında görüşlərin təşkilinə həsr olunub.
