Rusiya prezidenti Vladimir Putin ekstremist və arzuolunmaz təşkilatların informasiya resurslarında reklamın yayılmasını qadağan edən qanun imzalayıb.
NOCOMMENT.az xarici KİV-ə istinadən xəbər verir ki, sənəd rəsmi hüquqi informasiya portalında dərc olunub.
Düzəlişlər həmçinin Instagram və Facebook (Rusiya Federasiyasında qadağandır; Meta korporasiyasına məxsusdur) kimi platformalara da təsir edəcək. Qanunda qeyd olunur ki, həm reklam verənlər, həm də reklam yayıcıları qadağanın pozulmasına görə məsuliyyət daşıyacaqlar – bu cür pozuntulara görə cəza Rusiya Federasiyasının İnzibati Xətalar Məcəlləsində müəyyən edilmişdir. Bu məcəllənin 14.3-cü maddəsinə əsasən, reklam haqqında qanunun pozulması fiziki şəxsləri 2,5 min rubla qədər, vəzifəli şəxsləri 20 min rubla qədər, hüquqi şəxsləri isə 500 min rubla qədər cərimə ilə hədələyir.
Yeni qaydalar həmçinin Roskomnadzorun onlayn reklam, o cümlədən sosial reklam haqqında məlumatların saxlanma müddətini üç ilə qədər azaldır. Əvvəllər belə məlumatların saxlanma müddəti beş il idi.
Sənəddə yeni reqlamentlərin qüvvəyə minməsi üçün gecikmə müddəti nəzərdə tutulub. Beləliklə, yeniliklər 2025-ci il sentyabrın 1-dən qüvvəyə minəcək. Bloqerlər və Agentliklər Assosiasiyası yeni reqlamentin qüvvəyə minməsinin təxirə salınması təşəbbüsü ilə çıxış edib.
2024-cü ilin martında Putin reklam məhdudiyyətləri ilə bağlı daha bir qanun imzaladı. Sənəddə reklamın xarici agentlərin informasiya resurslarında yayılmasına, eləcə də resursların özlərinin reklamına qadağa qoyulub.
