Rusiya Daxili İşlər Nazirliyi iş adamı Mixail Xodorkovskini yenidən axtarışa verib.
NOCOMMENT.az apa-ya istinadən xəbər verir ki, iş adamı Rusiya ordusu haqqında feyk məlumatlar yaymaqda ittiham olunur.
Xodorkovski Rusiya Federasiyasının Ədliyyə Nazirliyi tərəfindən xarici agent kimi tanınıb.
Qeyd edək ki, Xodorkovski 1995-2003-cü illərdə “Yukos” neft şirkətinin rəhbəri olub. 25 oktyabr 2003-cü ildə mənimsəmə və vergidən yayınma ittihamı ilə həbs edilib. Həbs olunduğu zaman o, dünyanın ən varlı adamlarından biri olub, sərvəti 15 milyard dollar qiymətləndirilib.
2005-ci ildə o, Rusiya məhkəməsi tərəfindən dələduzluq və digər cinayətlərdə təqsirli bilinib. “Yukos” şirkəti iflas proseduruna məruz qalıb. 2010-2011-ci illərdə yeni ittihamlarla 14 il müddətinə azadlıqdan məhrum edilib. 10 il 2 ay həbsdə olub. 2013-cü ilin dekabrında Xodorkovski Prezident Putin tərəfindən əfv olunub və azadlığa çıxıb.
Daha sonra keçmiş oliqarx Avropaya köçərək ordan ictimai-siyasi fəaliyyətə başlayıb. Rusiyanın hazırki hakimiyyətinə müxalif olan Xodorkovski Moskvanın Ukraynada apardığı xüsusi hərbi əməliyyata qarşı çıxıb.
