Dövlət Dumasına hərbi qeydiyyata durmaqdan yayınmaya görə əldə edilmiş Rusiya vətəndaşlığından məhrumetmə mexanizmini nəzərdə tutan qanun layihəsi təqdim olunub.
NOCOMMENT.az xəbər verir ki, sənəd Dövlət Dumasının elektron bazasında dərc edilib.
Qanun layihəsində “Hərbi mükəlləfiyyət və hərbi xidmət haqqında” və “Rusiya Federasiyası vətəndaşlığı haqqında” qanunlara dəyişiklik edilməsi təklif olunur. İzahat məktubunda bildirilir ki, bu mexanizm 2024-cü ilin avqustunda qəbul edilmiş qanunun müddəalarının həyata keçirilməsi üçün vacibdir. Həmin qanuna əsasən, hərbi qeydiyyata ilkin şəkildə durmaq öhdəliyinin yerinə yetirilməməsi əldə edilmiş vətəndaşlıqdan məhrum edilməyə əsas yaradır.
Sənəddə göstərilir ki, hərbi komissarlıqlar əsaslı səbəb olmadan hərbi qeydiyyatdan yayınan şəxslər barəsində rəy tərtib edə biləcək. Bu rəy beş iş günü ərzində Daxili İşlər Nazirliyinin ərazi orqanına göndəriləcək və həmin orqan tərəfindən Rusiya Federasiyası vətəndaşlığının ləğvi ilə bağlı qərar verilə bilər.
