Rusiya ilə Yaponiya arasında dialoqun bərpası o halda mümkündür ki, Tokio Moskvaya qarşı düşmənçilik siyasətindən əl çəksin.
NOCOMMENT.az xəbər verir ki, bu barədə Rusiya Xarici İşlər Nazirliyi rəhbərinin müavini Andrey Rudenko Yaponiyanın Sasakava Sülh Fondunun rəhbərliyinin nümayəndə heyəti ilə görüşündə bildirib.
“Tam əməkdaşlığa gedən yol yalnız Yaponiyanın Rusiyaya qarşı konkret addımlarla təsdiqlənən düşmənçilik siyasətini rədd etməsi ilə açıla bilər”, – Rusiya Xarici İşlər Nazirliyi bəyan edib.
Fevral ayında Yaponiyanın baş naziri Siqeru İşiba Kuril adalarına iddialarla bağlı ritorikasını sərtləşdirib. O, Moskva və Tokionun Cənubi Kuril adalarının statusu məsələsini həll edə bilməməsindən və sülh müqaviləsi bağlaya bilməməsindən təəssüfləndiyini bildirib.
Yanvar ayında İşiba iki ölkənin münasibətlərinin gərgin olmasına baxmayaraq Tokionun Moskva ilə sülh müqaviləsi bağlamaq istədiyini bildirib. Onun sözlərinə görə, sülh müqaviləsinin bağlanması yalnız ərazi mübahisəsi həll olunandan sonra mümkün olacaq. Moskva hesab edir ki, Cənubi Kuril adaları İkinci Dünya Müharibəsindən sonra SSRİ-nin tərkibinə daxil olub. Tokio da öz növbəsində onların geri qaytarılmasını tələb edir.
