Azərbaycandan Həcc ziyarətinə getmək istəyən zəvvarların ilk qrupu sabah (iyunun 29-da) Səudiyyə Ərəbistanına yola düşəcək.
NOCOMMENT xəbər verir ki, ilk qrupu aparacaq təyyarə sabah saat 12:30-da Bakıdan Ciddəyə uçacaq.
Qafqaz Müsəlmanları İdarəsinin (QMİ) Xarici Əlaqələr şöbəsinin müdiri Vüsal Cahangiri report-a açıqlamasında bildirib ki, ilk qrupda 180 nəfər olacaq: “Həcc ziyarətinin proqramına gəlincə, zəvvarlar Ciddəyə endikdən sonra ehram bağlanılan yerə, oradan Məkkəyə gedir. Onların ilk əməlləri Ümreyi-təməttüdür, Kəbə evi ətrafında təvaf etmək, İbrahim məqamı arxasında 2 rükət təvaf namazı qılmaq, Səfa və Mərvə təpələri arasında səy etmək, sonda təqsir etmək, yəni saçdan bir qədər kəsməkdir.
Daha sonra Zülhiccə ayının 9-a kimi (8 iyul) vacibi ayin yoxdur. Zəvvarlar sərbəst şəkildə Kəbəyə gedib, namaz qılıb dua edirlər. Zülhiccə ayının 8-də Minaya gedilir, 9-da Ərəfata çıxacaq, Zülhiccənin 9-dan 10-a keçən gecə Müzdəlifəyə gedib orada vüquf edirlər. Zülhiccənin 10-u, Qurban bayramı günü Müzdəlifədən Minaya qayıdırlar, əşyalarını çadırlarda qoyub Camarata daş atmağa gedirlər. Camaratı daşladıqdan sonra qurban kəsirlər. Qurbandan sonra saçlarını kəsdirib Hacı olurlar.
Zülhiccənin 11-də, 12-də də Camarata gedib 3 sütunu, kiçik, orta və böyük sütunları daşlayırlar. Zülhiccənin 12-dən sonra Məkkəyə hotelə gəlirlər, sonra Kəbəyə gedib qalan vacibi ayinləri tamamlayırlar. Məkkədə ayinləri bitirdikdən sonra Mədinə şəhərinə gedirlər. Mədinədə 3 gün qaldıqdan sonra Vətənə geri dönürlər. Qeyd edim ki, Azərbaycana geri dönüş 19-20 iyulda planlaşdırılıb”.
QMİ rəsmisi əlavə edib ki, zəvvarların Bakıdan növbəti uçuşları iyunun 30-da, iyulun 1-də və 2-də olacaq.
Xatırladaq ki, builki Həcc ziyarətinə Azərbaycan zəvvarları üçün 680 nəfərlik kvota ayrılıb. Ziyarətin qiyməti 9 106 manat müəyyən olunub. Həcc ziyarətinə gedənlər Səudiyyə Ərəbistanı Krallığına daxil olmazdan 72 saat əvvəl PCR test verməlidirlər. Bundan başqa, iki doza vaksin tələb olunur. 30.06.1957 təvəllüddən aşağı olan şəxslərin Həcc ziyarətinə icazə verilmir.
Qeyd edək ki, Həcc ziyarətini Azərbaycanda Qafqaz Müsəlmanları İdarəsi təşkil edir. Son iki ildə koronavirus pandemiyası səbəbindən Azərbaycandan Həcc ziyarətinə gedən olmayıb.
Azərbaycanda iyulun 9-10-da Qurban bayramı qeyd olunacaq. Qurban kəsmək əsasən Məkkədə Həcc ziyarətində olan zəvvarlara vacibdir.
