Serbiyanın baş nazirinin müavini Aleksandr Vulin ölkəsi ilə Rusiya arasında yaxşı münasibətlər saxlamaq üçün canını verməyə hazır olduğunu bildirib.
NOCOMMENT.az xəbər verir ki, o, bu barədə TASS-a müsahibəsində danışıb.
“Mən Rusiya ilə münasibətlərimlə fəxr edirəm. Ömrümün son gününə qədər onlar üçün mübarizə aparacağam. Serbiya və Rusiya daha da yaxınlaşmalıdırlar, çünki bu, həm Serbiya, həm də Rusiya üçün çox yaxşıdır. Əgər bu, mənim həyatım bahasına başa gəlirsə, deməli, bu o qədər də yüksək qiymət deyil”, – deyə siyasətçi bildirib.
Vulinin sözlərinə görə, o, Moskva ilə dialoqu dəstəklədiyinə görə özünə qarşı təhdidlərdən qorxmur, çünki onun fikrincə, “bu dəhşətli vaxtlarda” siyasətlə məşğul olsanız, bunu gözləmək lazımdır. Serb baş nazirinin müavini onu da xatırladıb ki, o, Rusiya Federasiyası ilə yaxşı münasibətlərə görə artıq ABŞ-ın şəxsi sanksiyaları altındadır.
Vulin əlavə edib ki, serblərin Rusiya ilə dost olması asandır, çünki bu ölkə Belqrada qarşı heç vaxt aqressiya nümayiş etdirməyib və Kosovo ilə bağlı vəziyyətə münasibətdə onun tərəfindədir.
