ABŞ prezidenti Donald Trampın vəliəhd şahzadə Məhəmməd bin Salmanla görüşündən sonra məlum olub ki, Səudiyyə Ərəbistanı Yaxın Şərqdə F-35 qırıcılarını əldə edəcək ikinci ölkə olmağa hazırlaşır.
NOCOMMENT.az dünya mediasına istinadən xəbər verir ki bu, dünyanın ən müasir “görünməz” sinfinə aid döyüş təyyarələridir.
F-35 sadəcə qırıcı deyil — Vaşinqtonun tam nəzarət edə bildiyi sistemdir
Lakin əsas məsələ ondadır ki, F-35 adi döyüş təyyarəsi deyil, ABŞ-ın tam nəzarətində olan mürəkkəb texnoloji platformadır. Təyyarənin proqram təminatına inteqrasiya edilmiş “kill switch” mexanizmləri vasitəsilə Vaşinqton istənilən an onun funksionallığını məhdudlaşdıra və ya tam deaktiv edə bilər.
Elə buna görə də Birləşmiş Ərəb Əmirlikləri 2021-ci ildə, Trampın “İbrahim sazişləri” çərçivəsində verdiyi təklifə baxmayaraq, F-35 almaqdan imtina etmişdi. Programdan çıxarılan Türkiyə isə artıq öz milli qırıcısı olan Kaan üzərində işləyir və bu təyyarəni Səudiyyə Ərəbistanına təklif edir.
İsrail — F-35 üzərində suverenlik əldə edən yeganə ölkə
Hazırda dünyada F-35 üzərində tam suverenlik əldə edə bilən yeganə operator İsraildir. İsrail bu təyyarəni öz sistemləri, öz proqram təminatı və öz hərbi texnologiyaları ilə geniş şəkildə modernləşdirə bilir.
Nəticədə İsrail versiyası — F-35I “Adir” dünyanın digər bütün F-35 modellərindən xeyli üstün hesab olunur. Səudiyyə Ərəbistanına təklif edilən variant yüksək texnologiyalı, güclü və müasir olacaq, lakin o, “Adir” səviyyəsində olmayacaq.
