Şimali Koreya lideri Kim Çen In düşmənlərinə növbəti dəfə meydan oxuyub.
NOCOMMENT.az bildirir ki, o, öz adını daşıyan Milli Müdafiə Universitetinin 60 illik yubiley mərasimində bununla bağlı çıxış edib. Kim Çen In bildirib ki, Koreya yarımadası və ətrafında təhlükəsizlik mühiti getdikcə çətinləşir.
Cənubi Koreya-ABŞ ittifaqının tamamilə nüvə ittifaqına çevrildiyini vurğulayan In fikirlərini bu cür davam etdirib: “Biz dünyanın ən böyük nüvə gücü və onu manipulyasiya etməyə çalışan ən məkrli “kuklalarla” üz-üzəyik. Lakin ölkəmizə hücum edilərsə, bütün hərbi gücümüzü tərəddüd etmədən istifadə edəcəyik. Eyni zamanda nüvə silahından istifadə variantı nəzərimizdə olacaq”.
Kim Çen In həmçinin keçən həftə “Şimali Koreya rejiminə son qoymaq” haqqında danışan Cənubi Koreya prezidenti Yoon Suk Yeol-u da tənqid edib:
“Ağıllı siyasətçi ölkəsi və xalqının vəziyyəti təhlükə altında olarkən ehtiyatsız davranaraq nüvə dövləti ilə üzləşmək istəməz. Əvəzində hərbi münaqişənin yaranmasının qarşısını almaq üçün vəziyyəti idarə etməyə çalışar”.
Mümkün nüvə müharibəsi ehtimalına işarə edən Şimali Koreya lideri, “Bir daha vurğulayıram ki, belə bir vəziyyətdə sağ qalmaq ümidi əbəsdir. Cənubi Koreyanı nə şans, nə də ilahi güc qoruya bilər” deyib.
Son olaraq, ölkəsinin Cənubi Koreyaya hücum etmək niyyətinin olmadığını təkrarlayan In müdafiə silahlarının inkişaf etdirilməsi fəaliyyətlərini davam etdirəcəklərini də vurğulayıb. O, bu çərçivədə ölkəsinin nüvə potensialının qeyri-müəyyən müddətə artırılmalı olduğunu deyib.
