Nazirlər Kabineti yanında Operativ Qərargahın müvafiq qərarına əsasən koronavirus (COVİD-19) infeksiyasının yayılmasının qarşısının alınması məqsədilə tətbiq edilən xüsusi karantin rejimi çərçivəsində ölkədə hərəkət məhdudiyyətləri müəyyən olunub. Bu zaman bəzi narahatlıq doğuran məqamlar da vurğulanmalıdır ki, vətəndaş-polis münasibətlərində narazılıq və gərginlik olmasın.
NOCOMMENT.az xəbər verir ki, bunu Azərbaycan Vəkillər Kollegiyasının üzvü, tanınmış hüquqşünas Anar Qasımlı bildirib.
Anar Qasımlının sözlərinə görə, karantin rejimi tətbiq olunandan bəri Bakı-Abşeron-Sumqayıt ərazilərində nəqliyyat vasitələrinin hərəkəti məhdudlaşdırılmayıb.
“Nazirlər Kabinetinin 2 aprel tarixli qərarı ilə nəzərdə tutulmuş məhdudiyyətlər isə, aprelin 5-i saat 00:00-dan qüvvəyə minir. Bu, o deməkdir ki, 5 aprel saat 00-00-dək şəxsi nəqliyyat vasitəsilə Bakı-Abşeron-Sumqayıt ərazisində hərəkət edən şəxslərə münasibətdə, əgər həmin şəxslərin 65 yaşı tamam olmayıbsa, İXM-nin 211-ci maddəsi ilə cərimə yazıla bilməz. Ümumiyyətlə, məhdudiyyət avtomobilə tətbiq olunmur, avtomobilin sürücüsünə və sərnişinlərinə tətbiq olunur. Başqa sözlə, aprelin 5-i saat 00:00-dan etibarən şəxsi avtomobillərdə hərəkət edən və buna icazəsi olmayan sürücülər və sərnişinlər karantin rejimini pozduğuna görə cərimələnə bilərlər. Hərəkət etmək icazəsi olanlar isə, buna görə cərimələnə bilməzlər”, – deyə hüquqşünas bildirib.
A.Qasımlı həmçinin bildirib ki, dünən və bu gün qeyd olunan əsasla sürücülərə tətbiq olunmuş cərimələr ləğv olunmalı, sabah, yəni aprelin 4-ü də tətbiq olunmamalı, aprelin 4-dən 5-nə keçən gecə saat 00:00-dan etibarən tətbiq olunmalıdır.
“Hesab edirəm ki, DİN rəhbərliyi aprelin 5-dək yazılmış cərimələrin ləğv olunması istiqamətində təcili addımlar atmalı, ictimaiyyəti məlumatlandırmalıdır”, – deyə A.Qasımlı əlavə edib.
