SUBORDİNASİYA…!backend

SUBORDİNASİYA…!

  • whatsapp
  • messenger
  • telegram
  • vkontakte
  • odnoklassniki

İzn ver, regional idarə tikim…
İzn ver, zastava tikim…
İzn ver, mərkəzi bankın baş idarəsini yaradım…
İzn ver, aeroport anbarı tikim…
Beləcə, “izn ver” sədaları artır…

Beyni iflas edir adamın. Və çıxıb efirdə deməli olur ki, əl çəkin, yerinizi, bilin, işinizi görün, vermirəm, vəssalam!..
***

Əslində bu günəcən olanların nəticəsi idi bu. Zaman-zaman edilən xəbərdarlıqların kuliminasiyası da sayıla bilər olanlar. Yəni hər şey indi və bu gün baş verməyib. Buna keçmiş məcbur edir. Bu aydın sabah üçün keçmişin tələbidir. Illərdir Azərbaycanın bir də o problemi var ki, ifrat səbir nümayiş etdirildi. Iyirmi ilə yaxındır, siyasi liderin yanında fağır görkəmdə duranlar, dövlətin qanın sorur, BÜDCƏDƏN. Rüşvətlə, korrupsiya ilə insanların “canını alıblar”. Insanlardan azdırlar, amma güclüdürlər, sağlamdırlar, maddi imkanları güclüdür. Birinci şəxsə zəng edəcək “qırmızı telefonları”, bərk oturmağa “qırmızı stolları” var. Odur ki, kürəkləri yerə gəlmir.

Prezidentin fevralın 1-də AzTV-yə verdiyi müsahibəsində adıçəkilən, fövqəladə hallar nazirimi, sərhəd qoşunları komandanımı, ölkənin baş bankirimi, baş suçusumu, baş torpaq satanımı belədir təkcə, əsla?!. Ölkə onların balaca formasında adamlarla doludur. Indi təxminən belədir mənzərə. Insanlar gücdən düşmüş, ac, kasıb, yorğun. Məmurlar bəzəkli, varlı və kef içində. Və o qədər səlahiyyət veriblər ki, özlərinə, birbaşa izn istəyirlər rəhbərdən. Izn ver, tikək…Yəni biz də Qarabağda biznes başlayaq, qazanc əldə edək, bu tərəflərdən daha bir nəmənə çıxmır.
Dinimizdən mirasdır. Üç şeyə sahib duracaqsan. Əlinə, belinə, dilinə…Yəni oğrulamayacaqsan, əxlaqsızlıq etməyəcəksən, satqınlıqdan qaçacaqsan… Bunlarsa imandan gələn üç qadağanın məkbətini qurub. Hər şeyin əksini edən məmur ordusu yetişdirirlər.
***

Diqqət edirəm, biz də cəmiyyət olaraq durumu duyğusal dəyərləndiririk. Son çıxışında Prezident təkcə sadaladığı “adamyeyən” məmurlara yox, bütün cinahlarda, kabinetlərdə, vəzifələrdə oturanlara həm də onu deyir ki, yetər, artıq SUBORDINASIYANI gözləyin!

Yəni “izn ver” dövrü keçdi. Subardinasiya gözləmək şərtdir, vacibdir, lazımdır, vəssalam!

Hərdən bilirsinizmi nə düşünürəm. Bir mənzərə yaranır qarşımda, bu məmurlara indən belə də yer verilsə, Qarabağda onların bahalı obyektlərində nökər, fəhlə, ofisiant işləyən çox qazi əsgər, şəhid ailəsi, ata-anası, balası görəcəyik. Bəlkə orden medalları da elə yaxalarından asılı olacaq.
Bu mənzərə təbii ki, yırtıcı məmurun eyninə olmaz. Niyə? Onlar belə tərbiyə olunub, belə yaşayıb, belə ömür sürüblər axı. Ayağı baş, başı ayaq eləməyi yaxşı bacarırlar. Odur ki, indi ölkədə çox şey baş-ayaqdır. Bir o yaxşıdır ki, deyəsən başlar da, ayaqlar da yerini tapır asta-asta. Nə deyək, təki…

Jalə Mütəllimova

02.02.2020