“Sumqayıt şəhəri, 14-cü məhəllədə Ümummilli Lider Heydər Əliyevin anadan olmasının 95 və 102 illiyi münasibətilə əkilmiş ağaclar iş adamı, “Sumqayıt” MTK-nın rəhbəri Aslan Manafov tərəfindən məhv edilir”.
NOCOMMENT.az xəbər verir ki, bunu sakinlərin adından Bakupost.az -a həmin ünvanda yaşayan İsfəndiyar Rüstəmov bildirib.
Onun sözlərinə görə, yaşadıqları 1A/3B saylı binanın arxasında, Ümummilli Lider Heydər Əliyevin 95 illiyi münasibətilə 95 ədəd ağac əkilib:
“Hər il bu aksiya davam etdirilir. Sakinlər “95 ağac” aksiyası keçirərək orada xan çinarı, qovaq, şam, söyüd, müxtəlif dekorativ bitkilər və qızılgül kolları əkib. Bu il də Ulu Öndərin 102 illiyi münasibətilə ağaclar əkilib. Amma “Sumqayıt” MTK-nın rəhbəri Aslan Manafov həmin ərazini hasara alıb və heç bir dövlət qurumunun iştirakı olmadan ərazidə olan ağacları çıxartdırır. Orada bina tikmək istəyirlər. Amma bu, heç bir normativ aktlara, qanunvericiliyə uyğun şəkildə həyata keçirilmir. Çünki bizim bina ilə hasarın arası maksimum 6,8 metrdir. Orada hər hansı bir yanğın hadisəsi baş versə, binanın arxa tərəfində yaşayan sakinlərin təxliyyə yolu olmayacaq. Dövlət qurumlarından xahiş edirik ki, bu məsələni nəzarətə götürsünlər və yaşıllığın qorunması üçün bizə dəstək göstərsinlər”.
Məsələ ilə əlaqədar “Sumqayıt” MTK-nın rəhbəri Aslan Manafovla əlaqə saxlamaq cəhdlərimiz baş tutmadı. Onun mövqeyini işıqlandırmağa hazırıq.
Sumqayıt Şəhər İcra Hakimiyyətinin Mətbuat Xidmətinin rəhbəri Eyvaz Qocayev isə Bakupost.az -a bildirib ki, sakinlərin şikayəti ilə bağlı aidiyyatı qurumlara məlumat verilib, məsələ araşdırılacaq.
Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova da Bakupost.az -a açıqlamasında məsələdən xəbərdar olduqlarını bildirdi: “Hazırda əməkdaşlarımız sözügedən ərazidədir. Araşdırma aparılır. Nəticəsi barədə ətraflı məlumat veriləcək”.
