Suriyanın Moskvadakı səfiri Bəşər Cəfəri onun Rusiya Federasiyasından sığınacaq istəməsi ilə bağlı RİA Novosti mediasının xəbərlərini təkzib edib.
NOCOMMENT.az xəbər verir ki, bu barədə gazeta.ru məlumat yayıb.
“Xeyr, bu xəbər tamamilə doğru deyil”, – deyə o vurğulayıb.
Diplomat bu etibarsız məlumatdan təəccübləndiyini etiraf edib.
Cəfəri 2022-ci ilin oktyabrından Suriyanın Rusiyadakı səfirliyinə rəhbərlik edir. Aprelin 9-da məlum olub ki, diplomat Dəməşqə geri çağırılması barədə bildiriş alıb və orada ona administrasiyada vəzifə təklif olunduğu iddia edilib.
Aprelin 8-də SANA agentliyi Suriya Xarici İşlər Nazirliyindəki mənbəyə istinadən xəbər verib ki, Suriya diplomatik kadr dəyişikliyi çərçivəsində Rusiya və Səudiyyə Ərəbistanındakı səfirlərini mərkəzi ofisə keçirəcək.
Agentliyin məlumatına görə, Suriyanın müvəqqəti prezidenti Əhməd əl-Şaraa bu iki vəzifəyə təyinatla bağlı rəsmi qərar qəbul edənə qədər iki səfirliyin işlərini müvəqqəti işlər vəkili idarə edəcək.
