ABŞ prezidentliyinə Respublikaçılar Partiyasından namizəd Donald Tramp Ukrayna Silahlı Qüvvələrinin Kursk vilayəti ərazisinə daxil olması səbəbindən üçüncü dünya müharibəsi təhlükəsi barədə xəbərdarlıq edib.
NOCOMMENT.az xəbər verir ki, onun sözlərini “The Independent” nəşri sitat gətirir.
“Görün, Ukraynada nə baş verir. Rusiyaya qaçdılar. Üçüncü dünya müharibəsi olacaq”, – deyə Tramp bildirib.
Respublikaçı hesab edir ki, Ukraynanın Rusiya regionuna hücumu yeni dünya müharibəsinin həmişəkindən daha yaxın olduğunu nümayiş etdirir.
Bundan əvvəl Tramp xatırladıb ki, Rusiya ordusu qış şəraitində döyüş əməliyyatlarında əla təcrübəyə malikdir.
“Rusiya qışda yaxşı mübarizə aparır. Almaniyanı məğlub etdilər, Napoleonu məğlub etdilər. Onlar güclü hərbi qüvvədir, Ukrayna isə yox. Biz sadəcə olaraq Ukraynaya çoxlu pul ayırırıq”, – deyə o bildirib.
ABŞ prezidentliyinə namizəd onu da bəyan edib ki, üçüncü dünya müharibəsi ABŞ prezidenti Co Bayden və onun ətrafının səriştəsizliyi ucbatından başlaya bilər.
