ABŞ prezidentinin xüsusi elçisi Stiven Uitkoff Rusiyaya sonuncu səfəri zamanı prezident Vladimir Putini hazırkı cəbhə xəttində atəşkəslə razılaşmağa inandırmağa çalışıb, lakin dövlət başçısının bu təklifdən imtina etdiyi bildirilir.
NOCOMMENT.az xəbər verir ki, Bloomberg bu barədə “Moskvadakı mənbələrə” istinadən məlumat yayıb.
Agentliyin məlumatına görə, Rusiya prezidenti guya sülh sazişində Zaporijjya, Xerson vilayətləri və Donbassın hələ də Ukrayna Silahlı Qüvvələrinin nəzarətində olan hissələrinin Moskvaya verilməsini tələb edir.
Agentlik bildirib ki, bu tələb Donald Trampın sülh nizamlanmasına nail olmaq səylərinə “zərbə vurub”, xüsusən də Ağ Evdə bu sahədə irəliləyişin olmaması ilə bağlı artan məyusluğu nəzərə alsaq.
Bloomberg mənbələrindən biri danışıqların hazırda dalana dirəndiyini və daha da irəliləyiş əldə etmək üçün Putinlə Tramp arasında görüşə ehtiyac olduğunu bildirib.
