Vaşinqtonda antisemitizm motivləri ilə törədilən terror aktının qurbanları İsrailin ABŞ-dakı səfirliyinin əməkdaşları Yaron Leszczynski və Sarah Milgram olub.
NOCOMMENT.az CNN-ə istinadən xəbər verir ki, bu barədə İsrail Xarici İşlər Nazirliyinin rəhbəri Gideon Saar bildirib.
“Yaron Liszczynski və Sarah Milgram bir neçə saat əvvəl Vaşinqtonda vəhşicəsinə qətlə yetirilən millətimizin iki gənc nümayəndəsidir. Bu, dəhşətli terror aktıdır və 2023-cü il oktyabrın 7-dən İsrailə və yəhudilərə qarşı davam edən zəhərli antisemitizm təhrikinin birbaşa nəticəsidir”, – nazir bildirib.
Bundan əlavə, telekanal İsrailin ABŞ-dakı səfiri Yechiel Leiter-ə istinadən xəbər verib ki, gənclər cütlükdür və gələn həftə Qüdsdə nişanlanmağı planlaşdırırlar.
Bundan əvvəl ABŞ-ın daxili təhlükəsizlik naziri Kristi Noem Vaşinqtondakı Yəhudi Muzeyində keçirilən tədbirdən sonra İsrail səfirliyinin iki əməkdaşının qətlə yetirilməsi barədə məlumat vermişdi. O, hazırda fəal araşdırma aparıldığını bildirib və təcavüzkarın törətdiyi əmələ görə məsuliyyətdən qaçmayacağını vurğulayıb.
