“The Washington Post” nəşri ABŞ vitse-prezidenti Ceyms Devid Vensin Bakıya səfəri haqqında məqalə dərc edib. Rusiyanın uzun müddətdir öz nüfuz dairəsi hesab etdiyi Cənubi Qafqazda mühüm bir addım atan ABŞ vitse-prezidenti C.D. Vens bu həftə Ermənistan və Azərbaycana Moskvadan asılılığı zəiflədə biləcək, həmçinin qonşu İranın təsirini azaldacaq bir sıra ticarət və müdafiə sazişləri təklif edib. “Washington Post” nəşrinin ABŞ vitse-prezidentinin Azərbaycan və Ermənistana səfərinə həsr olunmuş məqaləsində belə deyilir.
“Əvvəllər heç bir hazırkı ABŞ prezidenti və ya vitse-prezidentinin ziyarət etmədiyi” paytaxtlar olan Bakı və İrəvana səfərləri zamanı Vens yeni tranzit dəhlizi planlarını açıqlayıb. Bu layihə sovet dövründən qalmış istifadəsiz dəmir yolu xəttini “Beynəlxalq Sülh və Rifah üçün Tramp Marşrutu”na (TRIPP) çevirməlidir. Bu, Ermənistan vasitəsilə Azərbaycanı öz eksklavı olan Naxçıvan və Türkiyə ilə birləşdirən, Rusiya və İrandan yan keçən 26 millik ticarət xəttidir.
Məqalə müəllifi yazır ki, bu layihə Vaşinqtonun vasitəçiliyi ilə razılaşdırılan və ötən ilin avqustunda Ağ Evdə Azərbaycan Prezidenti İlham Əliyev və Ermənistanın baş naziri Nikol Paşinyan tərəfindən imzalanan sülh təşəbbüsünün əsas elementinə çevrilib. ABŞ Prezidenti Donald Tramp bunu iki ölkə arasındakı “bitməyən müharibə”nin sonu elan edib.
Məsələni NOCOMMENT.az-a şərh edən siyasi şərhçi Elçin Alıoğlu deyib ki, Bakıya iki günlük səfəri çərçivəsində ABŞ vitse-prezidenti Cey Di Vens Azərbaycan Prezidenti İlham Əliyev ilə Strateji Tərəfdaşlıq haqqında Xartiya imzalayıb. Razılaşmalar çərçivəsində ABŞ Azərbaycana ölkənin ərazi sularını qorumaq üçün gəmilər təqdim etməyi vəd edib. Azərbaycan Prezidenti İlham Əliyev qeyd edib ki, bu əməkdaşlıq müdafiə satışı və süni intellekt texnologiyalarının inkişafı sahəsində “tamamilə yeni bir mərhələ” açır.
“Vaşinqton ilə tərəfdaşlıq İsrail ilə sıx strateji əlaqələri olan Azərbaycana Rusiya və İran arasında yerləşən, Qərbə dost bir müttəfiq kimi öz mövqeyini möhkəmləndirməyə imkan verəcək. Vensin səfəri Cənubi Qafqazda böyük yerdəyişməni vurğulayıb. WP qeyd edir ki, ənənəvi olaraq Azərbaycanı öz nüfuz dairəsi hesab edən Rusiya İkinci Qarabağ müharibəsindən sonra mövqelərini nəzərəçarpacaq dərəcədə zəiflədib. Həmin vaxt Azərbaycanın həyata keçirdiyi ildırımsürətli əməliyyat regionu yenidən Bakının nəzarətinə qaytarıb.
Azərbaycan diplomatik dəstək, hərbi təlimlər və digər təhlükəsizlik sahəsində əməkdaşlığı təmin edən Türkiyə ilə ittifaqını gücləndirir. Azərbaycan həmçinin “iri neft və qaz kəmərlərini Türkiyə vasitəsilə yönləndirərək, Moskvadan iqtisadi asılılığı tədricən azaldıb”.
Azərbaycan “Qərb və Türkiyə ilə əlaqələri gücləndirmək üçün iqtisadi və strateji imkanlardan istifadə edərək regiondakı mövqelərini möhkəmləndirir”, – ekspert vurğulayıb.
Tunar
NOCOMMENT.az
