Ukrayna prezidenti Vladimir Zelenskinin təqdim etdiyi “Qələbə planı”ndan başqa alternativ yoxdur.
NOCOMMENT.az xəbər verir ki, bunu Avropa Parlamentinin vitse-prezidenti Robert Zile Krım Platformasının III Parlament Sammitində çıxışı zamanı deyib.
O, Rusiyanın müharibədə qalib gəlməməli olduğunu vurğulayıb və bütün NATO-ya üzv dövlətləri Ukraynaya ÜDM-in ən azı 0,25%-i səviyyəsində hərbi dəstək verməyə çağırıb.
“Qərb ölkələri bu dəhşətli müharibəyə son qoymaq üçün həll yolu tapmağa sadiqdirlər. Biz bir-birimizlə əməkdaşlıq edə biləcəyimiz və qarşımızda duran çağırışların həlli yollarını tapa biləcəyimiz bir gələcək yaratmaq istəyirik. Prezident Zelenskinin təqdim etdiyi sülh planından(“Qələbə Planı” – Red.) başqa alternativ yoxdur”, – deyə Avropa Parlamentinin vitse-prezidenti vurğulayıb.
Bundan əlavə, Zile əmin edib ki, Avropa Parlamenti sülhün əldə olunmasında Ukraynanın etibarlı tərəfdaşıdır və olacaq.
O qeyd edib ki, Qərbdə “müharibədən yorulmuş” insanlar Rusiya ilə güzəştə getməyə və Ukraynanı ərazi güzəştlərinə çağırırlar.
“Ancaq işğal olunmuş ərazilərdə yaşayan o insanları xatırlayaq. Latviyada hər bir ailənin belə bir təcrübəsi var. Biz işğal altında yaşayırdıq, o zaman ki, işğalçı hakimiyyət pasportları əlindən alır, intellektual elitanı məhv edir. Düşmənlə necə güzəştə gedə bilərik? Xeyr, mümkün deyil”, deyə siyasətçi yekunlaşdırıb.
