“Tibbi Ərazi Bölmələrini İdarəetmə Birliyi” (TƏBİB) publik hüquqi şəxsin İcraçı direktoru Vüqar Qurbanovun başçılıq etdiyi nümayəndə heyətinin Almaniyaya səfəri çərçivəsində dövlət və özəl sektorda işləyən, eləcə də təhsilini davam etdirən 50-ə qədər azərbaycanlı həkimlə görüşü keçirilib.
NOCOMMENT.az xəbər verir ki, görüş TƏBİB-in, Azərbaycan Respublikasının Almaniya Federativ Respublikasındakı Səfirliyinin, Almaniyada Azərbaycanlı Tibb İşçiləri Birliyinin (AMD), Alman-Azərbaycanlı Tibb İşçiləri Birliyinin (DAMV), Almaniyanın Haydelberq Universitetinin Manhaym Tibb Mərkəzinin dəstəyilə baş tutub.
Görüşdə Almaniyada çalışan həkimlərin Azərbaycan səhiyyəsinin transformasiyasına cəlb edilməsi yolları mövzusunda fikir mübadiləsi aparılıb.
“Beyin ixracından beyin idxalına”, “Gələcəyin yol xəritəsi” mövzularında təqdimatlar keçirilib, azərbaycanlı həkimlərin Almaniyada həyata keçirdiyi işlər və layihələr barədə, eləcə də ölkəmizdə reallaşdırdıqları tibbi aksiyalar, konsiliumlar, 44 günlük Vətən müharibəsinin iştirakçılarına və şəhid ailələrinin üzvlərinə göstərdikləri müxtəlif tibbi dəstəklər barədə ətraflı məlumat verilib.
Görüşdə çıxış edən TƏBİB-in İcraçı direktoru Vüqar Qurbanov xarici ölkələrdə təhsil alan və çalışan tibb işçilərinə Azərbaycan dövləti və səhiyyə sistemi tərəfindən hər zaman dəstək göstərildiyini, bu dəstəyin gələcəkdə də səylə davam etdiriləcəyini qeyd edib. O, təcrübəli mütəxəssisləri ölkəmizdə tibb sahəsində həyata keçirilən layihələrdə, tibbi aksiyalarda fəal iştiraka, təcrübələrini yerli kolleqaları ilə bölüşməyə, beynəlxalq standartlara uyğun təlimlərin təşkilinə çağırıb.
İcraçı direktor xaricdə yaşayan tibb işçilərinin müəllifi olduğu layihələrə və təşəbbüslərə TƏBİB-in istənilən dəstəyə hazır olduğunu vurğulayıb.
Bundan başqa, V.Qurbanov Azərbaycanda fəaliyyət göstərmək istəyən tibb işçilərinə TƏBİB-in tabeliyindəki tibb müəssisələrində lazımi şəraitin yaradılacağını bildirib.
Almaniyada çalışan həkimlərimiz öz növbəsində görüşün əhəmiyyətini qeyd edib, fəaliyyətləri, Azərbaycan-Almaniya səhiyyə sisteminin oxşar və fərqli cəhətləri barədə məlumat veriblər.
