Covid-19-la bağlı şikayətlər hər gün dayanmadan artır. Gün keçdikcə vəziyyət ağırlaşır.
NOCOMMENT xəbər verir ki, bu gün Füzuli rayon sakini tərəfindən yenisabah-a daha bir şikayət daxil olub.
Rayon sakini Rasim Bağırov bildirir ki, onun bacısı Həsənova Sinəzər Bağır qızı ağır xəstədir. O, müalicə üçün paytaxta gəlmək məcburiyyətindədir. Bunun üçün də, Covid testi verib, amma 5 gündür cavab verilmir: “Əsas xəstəliyi ürəyində olduğu üçün çox əziyyət çəkir, ürəyinə su yığılıb. Əvvəllər bir az yaxşı idi, indi daha da pisləşib.
Biz də düşündük ki, bəlkə virusa yoluxub. Avqustun 21-də Füzuli rayon Mərkəzi Xəstəxanasında test verdik. 5 gün keçdi testdən bir cavab gəlmədi.
Xəstəxanaya getdik dedilər ki, test verən şəxs qeydiyyatda deyil, portalda adı da yoxdur. Bu hadisədən sonra Səhiyyə Nazirliyinə də müraciət etdim yenə maraqlanan olmadı. Analizin cavabı çıxsa idi, bilərdik ki, xəstəni Bakıya gətirək ya yox. Xəstə ölür artıq, indi biz nə edək? Təcili yardıma zəng edirik, onlar da gəlmir”.
