Tibbi Ərazi Bölmələrini İdarəetmə Birliyinin (TƏBİB) tabeliyində fəaliyyət göstərən “Yeni klinika” tibb mərkəzində Ümummilli lider Heydər Əliyevin anadan olmasının 100-cü ildönümü münasibətilə Yeni Azərbaycan Partiyasına (YAP) üzv qəbul olunmuş klinika əməkdaşlarına üzvlük vəsiqələri təqdim olunub.
NOCOMMENT.az -ın məlumatına görə tədbirdə tibb müəssisəsinin direktor vəzifəsini icra edən baş həkim Cavid Paşayev, Yeni Azərbaycan Partiyası Nizami rayon təşkilatının nümayəndəsi, mərkəzin tibb və qeyri-tibb heyəti iştirak edib.
Açılış nitqi ilə çıxış edən Cavid Paşayev Ümummilli lider Heydər Əliyevin sədrliyi ilə yaradılan Yeni Azərbaycan Partiyasının ölkəmizin inkişafında mühüm rol oynadığını, partiyaya olan böyük inam və etimadın təzahürü olaraq YAP sıralarına qoşulanların sayının daima artdığını bildirib.
Baş həkim son 6 ay ərzində partiyaya üzv olan klinika əməkdaşlarının sayının 42 nəfərdən 432-yə yüksəldiyini açıqlayıb.
Müəssisəsinin Hüquq şöbəsinin müdiri Əliheydər Heydərli Ümumilli lider Heydər Əliyevin siyası mirası olan Yeni Azərbaycan Partiyasının ötən 30 il ərzində nümunəvi, zəngin və şərəfli inkişaf yolu keçdiyini bildirərək partiyanın ölkəmizin hərtərəfli inkişafı istiqamətində üzərinə düşən vəzifələri layiqincə yerinə yetirdiyini vurğulayıb.
Sonda “Yeni klinika” tibb müəssisəsində fəaliyyət göstərən əməkdaşlara Yeni Azərbaycan Partiyasının üzvlük vəsiqələri təqdim olunub.
