Relsdən çıxan vaqonlarla yanaşı, bəzi vaqonları bürüyən alov onlarla insanın ölümünə və yaralanmasına səbəb olub.
NOCOMMENT xəbər verir ki, Larisadakı xəstəxanaya gətirilən yanmış cəsədlər DNT testi ilə müəyyən ediləcək. Yunanıstanı şoka salan qəzanın səbəbi hələ məlum olmasa da, Kathimerini qəzetində çıxan bir xəbər gündəmi dəyişib.
Çərşənbə axşamı Yunanıstanda eşidilən faciə xəbəri bir neçə dəqiqə ərzində bütün dünyada manşetlərə çevrildi. Ölkənin mərkəzi hissəsindəki Larisa şəhəri yaxınlığında yüksək sürətlə sərnişin qatarı ilə yük qatarı toqquşub. Amerikanın Associated Press xəbər agentliyi qəzanın baş verdiyi kiçik Tempe şəhərinin paytaxt Afinadan 380 kilometr şimalda yerləşdiyini bildirib. Vadinin sahilində yerləşən əsas magistral Tempedən keçir və dəmir yolu tunelləri var.
Qatarların eyni xətt üzrə hərəkət edərkən toqquşduğu bildirilir. Toqquşma zamanı sərnişin qatarında 342 sərnişin və 10 işçi olub.
Qəza xəbərdarlığı ilə hadisə yerinə yanğınsöndürənlər və onlarla təcili tibbi yardım maşını göndərilib. 150 yanğınsöndürən və xilasetmə qrupu səhərə qədər sərnişin qatarında qalmış insanları çıxarmağa çalışıb. Yanğınsöndürmə briqadasının sözçüsü Vassilis Varthakoyiannis bildirib ki, şərait xilasedicilər üçün çox çətin olub.
