Ukraynanın iqtisadiyyat nazirinin müavini və ticarət nümayəndəsi Taras Kaçka ölkə prezidenti Vladimir Zelenskinin Amerika lideri Donald Trampa məktubunda ABŞ və Ukrayna arasında azad ticarət zonasının yaradılmasını təklif etdiyini bildirib.
NOCOMMENT.az xəbər verir ki, bu barədə TASS məlumat yayıb.
Nazir müavininin sözlərinə görə, Zelenski hesab edir ki, Ukraynanın istehsal şirkətləri diqqətini “daha zəngin, daha inkişaf etmiş” və məhsulun keyfiyyətinə daha yüksək tələblərə malik olan xarici bazarlara yönəltməlidir. Kaçka əlavə edib ki, Ukraynanın ABŞ-a ixrac imkanlarına diqqət yetirməsi və azad ticarət sazişinin olması vacibdir.
Onun fikrincə, faydalı qazıntılar üzrə saziş çərçivəsində ABŞ-Ukrayna investisiya fondunun yaradılması ölkələr arasında azad ticarətin qurulmasına kömək edəcək. O, hesab edir ki, bu, azad ticarət müqaviləsində fondun fəaliyyətinin şərtlərinin dəqiq göstərildiyi halda mümkündür. Kaçka qeyd edib ki, bu, təkcə tarif məsələlərini həll etməyəcək, həm də tənzimləmə mühitinin şəffaflığını və proqnozlaşdırılmasını təmin edəcək.
