Zülfüqarov: Bu beş vacib məsələni həll etməliyikbackend

Zülfüqarov: Bu beş vacib məsələni həll etməliyik

  • whatsapp
  • messenger
  • telegram
  • vkontakte
  • odnoklassniki

Ermənistan-Azərbaycan münaqişəsinin hərbi fazasının ikinci mərhələsi başa çatdı və biz yeni mərhələnin başlanğıcının astanasındayıq.

NOCOMMENT axar.az-a istinadən xəbər verir ki, bunu sabiq xarici işlər naziri, politoloq Tofiq Zülfüqarov deyib.

Onun sözlərinə görə, yeni mərhələni iki dövlətin aşağıdakı şəraitdə hərbi-siyasi qarşıdurması kimi səciyyələndirmək olar: “Rusiya və Türkiyə hərbçilərinin Azərbaycana gəlmələrinin mənası odur ki, Ermənistanın təslim olması şərtlərinə görə onun silahlı qüvvələri bizim ölkənin bütün ərazisini tərk etməyə məcbur edilib, münaqişəyə qədər əsasən ermənilərin yaşadıqları ərazinin bir hissəsində isə təhlükəsizliyi Rusiya sülhməramlıları təmin edəcəklər. Bu zonalar tamamilə silahsızlaşdırılmalıdır və orada yalnız Rusiya hərbçilərində silah olacaq. Münaqişə zonasındakı Azərbaycanın nəzarətində olan bütün ərazilərdə və 1 dekabr tarixindən sonra nəzarətimizə keçəcək digər torpaqlarımızda dövlətimizin yurisdiksiyası tam həcmdə və məhdudiyyətsiz şəkildə bərpa olunacaq.

Yuxarıda qeyd olunan hərbi-texniki reallıqlar çərçivəsində ümumilikdə beynəlxalq aləm tərəfindən tanınmış məhz bizim torpaqlarımızın yerdə qalan 3 faizi üzərində Azərbaycanın suverenliyinin bərpası istiqamətində siyasi proseslər baş verəcək”.

Politoloq qeyd edib ki, razılaşmaların həyata keçirilməsi ilə 1 dekabr tarixindən sonra məcburi köçkünlərin 99 faizə qədəri – 1991-1994-cü illərdə erməni silahlı qüvvələri tərəfindən törədilmiş total-etnik təmizləmənin qurbanı olmuş azərbaycanlılar öz evlərinə qayıtmaq imkanı qazanacaqlar:

“Qeyd olunanlardan çıxış edərək, əsas taktiki vəzifələr aşağıdakılardır:

1. Ağdam, Kəlbəcər və Laçın rayonlarından qoşunların çıxarılması cədvəli ilə nəzərdə tutulmuş tədbirlərin qeyd-şərtsiz icrası;

2. Dekabrın 1-dən sonra ən qısa müddət ərzində Ermənistan silahlı qüvvələrinin yerdə qalan bütün bölmələrinin və texnikasının müəyyənləşdirilməsi və Azərbaycan ərazisindən çıxarılmasının təmin edilməsi;

3. Sülhməramlı qüvvələrin müvəqqəti nəzarəti altında olan ərazilərdə qanunsuz silahlı birləşmələrin tərksilah edilməsi və ərazidən çıxarılması;

4. Hazırda qanunsuz silahlı birləşmələrin dövriyyəsində olan silah və hərbi texnikanın toplanması və Azərbaycan tərəfinə təhvil verilməsi;

5. Sülhməramlı qüvvələrin nəzarətindəki ərazilərdə qeyri-qanuni olan şəxslərin müəyyənləşdirilməsi və oradan uzaqlaşdırılması.

Bu vəzifələri yerinə yetirmək üçün sülhməramlı qüvvələrin və müşahidə missiyasının mandatının müəyyənləşdirilməsi üzrə Rusiya Federasiyası və Türkiyə Respublikası ilə dərhal danışıqlara başlayacaq hökumət orqanı yaratmaq lazımdır. Nəticədə meydana çıxacaq sənəd Milli Məclisin xüsusi qərarı ilə təsdiq edilməlidir”.