“Məlum olduğu kimi, 2025-ci ildə minimum əməkhaqqı və digər sosial ödənişlərin artacağı proqnozlaşdırılır. Pensiyanın orta artım tempi qanunvericiliyə uyğun olaraq, təxminən 8-9 faiz ətrafında olacaq. Sosial müavinətlər 10-15 faiz arasında artırılacaq. Çox güman ki, minimum aylıq əməkhaqqı ilə bağlı da eyni yanaşma tətbiq ediləcək”.
NOCOMMENT.az xəbər verir ki, bunu Bakupost.az -a iqtisadçı ekspert Rəşad Həsənov deyib.
O bildirib ki, minimum əməkhaqqının 400 manata çatdırılması ehtimalı yüksəkdir. Böyük ehtimal ki, minimum əməkhaqqı 10-15 faiz artaraq 400 manat olacaq:
“Ehtiyac meyarı göstəricisi nəzərə alınsa, minimum əməkhaqqı təxminən 600-650 manat olmalıdır. Amma hələlik minimum əməkhaqqı 400 manata çatdırılacaq”.
Ekspert vurğulayıb ki, təbii ki, minimum əməkhaqqının artımı digər sektorlara da təsir edəcək:
“Birmənalı olaraq özəl sektorda da bu göstəriciyə uyğun olaraq əməkhaqqları artırılmalıdır. Çünki minimum əməkhaqqı göstəricisi dövlət və özəl sektoru əhatə edir”.
