Ermənistanın baş naziri Nikol Paşinyan öz partiyasının Vaqarşapatda qalib gəlməsini “bütün ermənilərin Katolikosunun vəzifədən uzaqlaşdırılması üçün verilmiş mandat” kimi qiymətləndirib.
NOCOMMENT.az xəbər verir ki, o, təbrik mesajında bu nəticələrin Eçmiədzinin hazırkı rəhbəri II Qareginin “azad edilməsi” prosesinə yeni təkan verdiyini bildirib.
Paşinyanın bəyanatı ölkədə uzun müddətdir davam edən kilsə–dövlət qarşıdurmasını daha da kəskinləşdirib. Son illərdə hökumətlə Eçmiədzin rəhbərliyi arasında gərginlik dərinləşib: kilsə Paşinyanı dini institutların nüfuzunu zəiflətməkdə, hökumət isə kilsəni daxili islahatlara mane olmaqda ittiham edir.
Bundan əvvəl də Paşinyanın kilsə rəhbərliyini tənqid etməsi, Eçmiədzinin siyasi proseslərə təsir göstərdiyini iddia etməsi mübahisələri artırmışdı.
Hazırkı açıqlama isə qarşıdurmanın yeni mərhələyə keçdiyini göstərir və kilsə tərəfdarları ilə hökumət yanlıları arasında narazılığın daha da dərinləşəcəyi gözlənilir.
