İrəvan şəhərində fəaliyyət göstərən Antikorrupsiya Məhkəməsinin binası önündə rusiyalı tanınmış iş adamı Karapetyanın tərəfdarları ilə polis qüvvələri arasında kütləvi dava və əlbəyaxa qarşıdurma baş verib.
NOCOMMENT.az xəbər verir ki, erməni mediasının yaydığı son məlumatlara görə, polisin qanuni tələblərinə tabe olmayan və ictimai asayişi pozan 17 nəfər dərhal saxlanılaraq polis bölmələrinə aparılıb.
Hadisə iş adamının məhkəmə prosesi davam etdiyi bir vaxtda alovlanıb. Karapetyana dəstək nümayiş etdirmək üçün toplaşan kütlə məhkəmə binasına daxil olmağa və ya prosesə təsir göstərməyə çalışıb ki, bu da asayiş keşikçilərinin sərt müdaxiləsi ilə nəticələnib. Qarşıdurma zamanı tərəflər arasında fiziki təzyiqlər qeydə alınıb, polisin əraziyə əlavə qüvvələr cəlb etdiyi bildirilir.
Ekspertlər qeyd edirlər ki, Ermənistanda korrupsiya ilə mübarizə çərçivəsində aparılan məhkəmə işləri tez-tez bu cür kütləvi etirazlar və qarşıdurmalarla müşayiət olunur. Xüsusilə Rusiya ilə biznes əlaqələri olan şəxslərin məhkəmə prosesləri həm də siyasi çalar qazanır. Hazırda məhkəmə binasının ətrafında təhlükəsizlik tədbirləri maksimum dərəcədə gücləndirilib, saxlanılan şəxslərin barəsində isə xuliqanlıq və hakimiyyət nümayəndəsinə müqavimət maddələri ilə araşdırmalara başlanılıb.
Sara,
NOCOMMENT.az
