Livan parlamenti sədrinin köməkçisi Əli Həsən Xəlil bazar ertəsi verdiyi bəyanatda İsrail ordusunun ötən həftə “Hizbullah” ilə əldə olunmuş atəşkəs razılaşmasından sonra Livanın cənubunda həyata keçirdiyi hərbi əməliyyatların dəhşətli nəticələrini açıqlayıb.
Rəsmi şəxsin sözlərinə görə, atəşkəsin qüvvəyə minməsindən bu yana İsrail qüvvələri Livanın cənubunda yerləşən 39 kəndi tamamilə və ya qismən məhv edib.
NOCOMMENT.az xəbər verir ki, “Hizbullah”ın müttəfiqi olan “Amal” hərəkatının üzvü və keçmiş maliyyə naziri Əli Həsən Xəlil bildirib ki, İsrail ordusu tərəfindən törədilən güclü partlayışlar cənubdakı mülki evləri xarabalığa çevirib. O, bu hərəkətlərin atəşkəs şərtlərinin kobud şəkildə pozulması olduğunu və beynəlxalq hüquq müstəvisində “aşkar müharibə cinayəti” təşkil etdiyini vurğulayıb.
Livan tərəfi iddia edir ki, İsrail mülki infrastrukturu hədəf almaqla bölgənin demoqrafik strukturuna və insanların geri qayıtmaq imkanlarına zərbə vurur. Beynəlxalq müşahidəçilər isə hələ də kövrək olan atəşkəs rejiminin bu kimi insidentlər fonunda tamamilə çökə biləcəyindən narahatlıqlarını ifadə edirlər.
Sara,
NOCOMMENT.az
