Böyük Britaniyanın Qlosterşir qraflığında yerləşən və ABŞ Hərbi Hava Qüvvələrinin İrana qarşı “Epic Fury” əməliyyatında istifadə etdiyi strateji RAF Fairford aviabazasında bu gün səhər saatlarında genişmiqyaslı yanğın baş verib. Hadisə yerli vaxtla bazar günü, 2026-cı il aprelin 26-da qeydə alınıb və dərhal əraziyə çoxsaylı yanğınsöndürən briqadalar cəlb olunub. Şahidlərin verdiyi məlumata və yayılan görüntülərə görə, alovun şiddətindən binalardan birinin dam örtüyü tamamilə çöküb və qatı tüstü dumanı bütün bazanı bürüyüb. Yerli sakinlərə təhlükəsizlik məqsədilə pəncərələri bağlı saxlamaq barədə xəbərdarlıq edilib.
NOCOMMENT.az xəbər verir ki, RAF Fairford aviabazası hazırda ABŞ-ın İrana qarşı həyata keçirdiyi hava hücumlarında mühüm rol oynayır və burada İrana ağır zərbələr endirən B-52H Stratofortress və B-1B Lancer bombardmançı təyyarələri yerləşdirilib. Britaniya Müdafiə Nazirliyindən verilən ilkin məlumata görə, yanğın nəticəsində hər hansı təyyarəyə və ya hərbi personala ziyan dəyməyib, lakin ABŞ-a məxsus texniki avadanlıqların və ya infrastrukturun statusu ilə bağlı araşdırmalar davam edir. Maraqlıdır ki, bu hadisə şənbə günü bazanın qarşısında müharibəyə etiraz edən təxminən 200 nəfərin iştirakı ilə keçirilən dinc aksiyadan cəmi bir neçə saat sonraya təsadüf edir. Hazırda yanğının səbəbləri məlum deyil və əməliyyatların gedişatına təsir edib-etmədiyi rəsmən açıqlanmayıb. Hadisə ilə bağlı həm Britaniya, həm də ABŞ rəsmiləri tərəfindən geniş təhqiqat aparılır.
Sara
