Xəbər verdiyimiz kimi, Milli Məclis tərəfindən MSK-nın yeni tərkibi təsdiqlənib. Bizim.Media xəbər verir ki, Mərkəzi Seçki Komissiyanın yeni tərkibində yer almayan şəxslərin adları məlum olub. Belə ki, MSK-nın 2021-ci ildə formalaşan tərkibində yer alan Milli Məclisdə heç bir siyasi partiyaya mənsub olmayan və onun namizədliyini təqdim edən deputatları təmsil edən Nizami Nadirxanlı, Milli Məclisdə deputatları çoxluq təşkil edən və onun namizədliyini təqdim edən siyasi partiyanı təmsil edən Validə Kazımova və Şaitdin Əliyevin MSK-nın üzvlüyünə namizədliyi irəli sürülməyib.
NOCOMMENT.az Şaitdin Əliyevin dosyesini təqdim edir:
Şaitdin Sərdar oğlu Əliyev 18 sentyabr 1947-ci ildə anadan olub. Ali təhsilini Azərbaycan Politexnik İnstitutunun hidromeliorasiya fakültəsində və S. Kirov adına Azərbaycan Dövlət Universitetinin hüquq fakültəsində tamamlayıb. Peşəkar fəaliyyəti boyu həm mühəndislik, həm də hüquq sahəsindəki biliklərini dövlət idarəçiliyində tətbiq edib. Ailəlidir, beş övladı var.
Siyasi fəaliyyətinə parlament səviyyəsində başlayan Şaitdin Əliyev, 1995-ci il noyabrın 26-da keçirilən təkrar seçkilərdə 18 nömrəli Əzizbəyov dairəsindən bitərəf namizəd kimi I çağırış Milli Məclisin deputatı seçilib. Bu dövrdə o, Sosial siyasət Daimi Komissiyasının sədr müavini kimi çalışıb və Azərbaycan-Küveyt parlamentlərarası əlaqələr üzrə işçi qrupuna rəhbərlik edib. 2000-ci ildə növbəti parlament seçkilərində Yeni Azərbaycan Partiyasının namizədi olaraq II çağırış Milli Məclisdə təmsil olunmaq hüququ qazanıb. Bu çağırışda Regional məsələlər Daimi Komissiyasının sədr müavini, həmçinin Azərbaycan-Rumıniya parlamentlərarası əlaqələr üzrə işçi qrupunun rəhbəri vəzifələrini icra edib.
Şaitdin Əliyevin dövlət qulluğundakı növbəti mühüm mərhələsi seçki qanunvericiliyinin icrası ilə bağlı olub. O, 8 iyun 2010-cu ildə Mərkəzi Seçki Komissiyasının (MSK) üzvü seçilib, iki gün sonra isə komissiyanın sədr müavini vəzifəsinə gətirilib. MSK-dakı fəaliyyəti dövründə bitərəf statusunu qoruyub saxlayıb. 2021-ci ilə qədər bu vəzifəni davam etdirən Ş.Əliyev, həmin il komissiyanın tərkibi yenilənərkən siyahıda yer almayıb. Dövlət qarşısındakı xidmətləri yüksək qiymətləndirilərək 2007-ci ildə “Şöhrət” ordeni, 2017-ci ildə isə 2-ci dərəcəli “Vətənə xidmətə görə” ordeni ilə təltif edilib.
Tunar,
NOCOMMENT.az
