“Paşinyan türklərin çaldığı havaya oynamağa davam edir”.
NOCOMMENT yenisabah-a istinadən xəbər verir ki, bunu özünün feysbuk səhifəsində “Çiçəklənən Ermənistan” Partiyasının nümayəndəsi Arman Abovyan yazıb.
Onun sözlərinə görə, Azərbaycan, Türkiyə, Qırğızıstan, Qazaxıstan, Özbəkistan, qismən Türkmənistan və Pakistan Panturan layihəsi çərçivəsində daim ortaq inteqrasiya prosesləri qurur. “Söhbət yalnız hərbi komponentdən deyil, həm də dərin iqtisadi inteqrasiyadan gedir. Məsələn, Türkiyə və Azərbaycanın “bir millət-iki dövlət” konsepsiyası qaçılmaz olaraq “bir dövlət-iki türk milli birliyi” anlayışına çevrilir”.
Arman Abovyan Ermənistandakı hökumətyönümlü dairələrin və hakimiyyət nümayəndələrinin “Panturan layihəsinin mövcudluğunu və həyata keçirilməsini inkar etməyə və ya heç olmasa minimuma endirməyə çalışdıqlarını qeyd edir. “Lakin regional hadisələr Türkiyənin bu layihəni ardıcıl olaraq həyata keçirdiyini açıq şəkildə nümayiş etdirib. Bununla belə, Azərbaycanla torpaq birləşməsi olmasa, Böyük Türk imperatorluğunun bərpası mümkün deyil. Türklər üçün yeganə yol türklərin və azərbaycanlıların son hədəfi olan Ermənistanın cənubunun (Sünikin) ilhaqıdır”.
Onun fikrincə, mahiyyətcə bu sadə layihəni görməkdən imtina etmək üçün adam ya cahil, ya da axmaq və ya xain olmalıdır. “Ermənistanın türklərə və azərbaycanlılara nəqliyyat dəhlizi verməyi qəbul etdiyi andan etibarən, Ermənistanın bölünmə prosesi başlayacaq, – deyə Arman Abovyan əmindir. – Üstəlik, bu ilin sonuna qədər Nikol Paşinyan administrasiyası və “müavinləri” düşmən üçün sərhədlərin açılması üçün hər şeyi edəcəklər. Əslində, Qarabağdan sonra Ermənistan özünü fiziki məhvinə başlayacaq. Sərhədləri təyin etmək, demilitarizasiya etmək və onları açmaq üçün razılığa gələrək Paşinyan hökuməti türk havasına oynamağa davam edir”.
