Lerik rayonunda baş vermiş ağır yol-nəqliyyat hadisəsi gənc bir həyatın faciəvi şəkildə sonlanması ilə nəticələnib. Hadisə günorta saat 13 radələrində rayonun Nəsodi kəndi ərazisində qeydə alınıb. Astara rayonunun Motlayataq kənd sakini, 1999-cu il təvəllüdlü Həmzə Pənah oğlu Mirseyidzadə idarə etdiyi “QAZ-66” markalı yük avtomobili ilə çətin relyefli yolda hərəkətdə olarkən qəfildən idarəetməni itirib.
NOCOMMENT.az xəbər verir ki, nəticədə nəqliyyat vasitəsi yoldan çıxaraq dərəyə aşıb. Qəza zamanı ağır xəsarətlər alan gənc sürücü ətrafdakı insanların və yaxınlarının köməyi ilə dərhal Lənkəran Rayon Mərkəzi Xəstəxanasına çatdırılsa da, təəssüf ki, yolda dünyasını dəyişib və tibb müəssisəsinə çatdırılanda artıq həkiməqədər ölüm faktı qeydə alınıb.
Xüsusi qeyd edilməlidir ki, hadisə nəticəsində vəfat edən 27 yaşlı Həmzə Mirseyidzadə Azərbaycanın ərazi bütövlüyü uğrunda gedən 44 günlük Vətən müharibəsinin fəal iştirakçılarından biri olub və döyüş yolu keçib.
Şəxsi həyatında yeni bir mərhələyə qədəm qoyan gənc qazi cəmi bir neçə ay əvvəl, fevralın 9-da ailə həyatı qurmuşdu. Onun qəfil ölümü həm doğmaları, həm də döyüş yoldaşları arasında böyük kədərə səbəb olub.
Hadisədən dərhal sonra zəruri hüquqi prosedurlara başlanılıb. Mərhumun meyiti daxili və xarici müayinə olunması məqsədilə Məhkəmə Tibbi Ekspertiza və Patoloji Anatomiya Birliyinin Lənkəran rayonlararası zona mərkəzinə təhvil verilib. Hazırda faktla bağlı hüquq-mühafizə orqanları tərəfindən araşdırma aparılır, qəzanın dəqiq səbəbləri və texniki nasazlıq ehtimalları öyrənilir.
Aylin,
NOCOMMENT.az
