Rusiya ordusunun Kiyev şəhərinə təşkil etdiyi son kütləvi hava hücumları zamanı Azərbaycan Respublikasının Ukraynadakı səfirliyinin inzibati binasının növbəti dəfə ciddi zərər görməsi regional müstəvidə çox qaranlıq və riskli suallar doğurub. "Lukyanovka" metro stansiyasının yaxınlığına düşən raketin yaratdığı güclü partlayış dalğası nəticəsində səfirliyin pəncərələri sınıb, tavan və divarlarında çatlar əmələ gəlib. Şəxsi heyətin xəsarət almaması böyük təsəlli olsa da, müharibənin əvvəlindən bəri diplomatik nümayəndəliyimizin və SOCAR-a məxsus strateji kommersiya obyektlərinin mütəmadi olaraq zərbələrə məruz qalması bu hadisələrin təsadüfi xarakter daşımadığı barədə şübhələri artırır. Ən diqqətçəkən və düşündürücü məqam isə odur ki, Kiyevdəki səfirliyimizin vurulması Azərbaycanın xarici işlər naziri Ceyhun Bayramovun Moskvaya reallaşdırdığı rəsmi səfərdən cəmi bir gün sonraya təsadüf edib. Bu zamanlama Kremlin Bakının müstəqil xarici siyasət kursuna və Ukrayna ilə olan humanitar-siyasi münasibətlərinə qarşı verdiyi qeyri-rəsmi, lakin sərt bir siqnal kimi qiymətləndirilir.
Məsələ ilə bağlı NOCOMMENT.az-a danışan professor, politoloq Qabil Hüseynli qeyd edib ki, Azərbaycan səfirliyinin yerləşdiyi koordinatların Moskvaya çox yaxşı məlum olmasına rəğmən bu hadisənin baş verməsi rəsmi Bakıya qarşı yönəlmiş aşkar bir təzyiq elementidir: "Müasir hərbi texnologiyalar və yüksək dəqiqlikli raketlər dövründə diplomatik binaların bu dərəcədə yaxınlığına zərbə endirilməsini sadəcə 'təsadüf' və ya 'hədəfdən yayınma' kimi qəbul etmək sadəlövhlük olardı. Xüsusən də xarici işlər naziri Ceyhun Bayramovun Moskvada keçirdiyi mühüm görüşlərin dərhal ardınca bu hadisənin yaşanması diplomatik dillə desək, Bakıya ünvanlanmış bir xəbərdarlıq siqnalıdır. Rusiya bu cür addımlarla Azərbaycana çatdırmaq istəyir ki, onun Ukrayna ilə qurduğu yaxın münasibətlər, İrəvan üzərindəki Qərb layihələrinə qarşı manevrləri və müstəqi xətti Kremlin maraqları ilə tam uzlaşmır. Səfirliyin hədəf dairəsinə salınması Bakının qlobal geosiyasi proseslərdə daha ehtiyatlı davranmasını təmin etməyə hesablanmış hərbi-siyasi basqıdır".
Onun sözlərinə görə, Rusiya tərəfindən gələn bu təhlükəli mesajlar Azərbaycanın Ukraynanın suverenliyinə verdiyi prinsipial dəstəyi və humanitar yardımları dayandırmaq məqsədi güdür: "Azərbaycan uzun müddətdir ki, Ukraynaya qardaş fəlakəti fonunda nəhəng humanitar yardımlar göstərir, enerji və infrastruktur layihələrinin bərpasına kömək edir və beynəlxalq hüquq çərçivəsində Kiyevin ərazi bütövlüyünü tanıyır. Eyni zamanda SOCAR-ın Ukraynadakı strateji varlığı da Moskvanı qıcıqlandıran əsas iqtisadi amillərdəndir. Nazirin səfərindən dərhal sonra diplomatik korpusumuzun raket dalğasına məruz qalması göstərir ki, Kreml Azərbaycanı öz təsir dairəsində saxlamaq və regional münaqişələrdə tamamilə neytrallaşdırmaq üçün hərbi rıçaqları simvolik olaraq nümayiş etdirməkdən çəkinmir. Lakin Azərbaycan diplomatiyası bu növ təhdidlərlə öz yolundan dönəcək dövlət deyil və Bakı öz milli maraqlarını, o cümlədən xarici ölkələrdəki diplomatlarının təhlükəsizliyini qorumaq üçün beynəlxalq hüququn bütün imkanlarından istifadə etməyə davam edəcəkdir".
Tunar,
